Danmarkimi ilinniartunngorneq kulturikkut tupatsinneqaataavoq
Nunaminni pisssutsit sungiusimasatik qimallugit. Imarpik isorartoqisoq qulaallugu. Nunamut sungiusimanngisamminnut ilinniagaqarnissartik siunertaralugu inuusuttorpassuit ukiut tamaasa Danmarkimut nuuttarput. Inuuneq nutaaq ajunngitsorpassuarnik misigisaqarfiusartoq aammali artornarsinnaasoq aqqusaartarpaat.
Danmarkimut ilinniariat kalaallit ilaasa arfineq marluk, nunami allami ilinniagaqalerlutik najugaqalernertik maanna atuaganngorlugu oqaluttuaraat.
Piffimmiit piffimmut ungasippallaarneri pissutigalugit, nalunaaquttap akunneri arlallit qimuttuitsorneq imaluunniit busserneq. Atuarfimmi oqalugiartoqartillugu sanilerisamik ilassineqartannginneq. Tallimanngornerit tamaasa universitetip kiileriani erngunneq, atuaqatit danskit alakoortuartut.
Ilinniagaqalernissaq siunertaralugu Danmarkimut nuunneq kulturikkut tupatsitsisinnaaqaaq. Taamaattoqartarneralu kalaallit inuusuttorpassuit ilisimasaqarfigaat.
Kalaallit inuusuttut arfineq marluk, atuakkami "Avalannerit", taama qulequtalimmi, oqaluttuaraat, danskit isumaasa pigiliutiinnagaat kalaallinut, attaveqarniarneq aammalu siunissamut pilersaarutit.
Inuusuttut taakku ilagaat, 29-nik ukiulik Agathe Adolfsen. Taanna Nuummiit Aalborgimut nuunneruvoq, serviceøkonomitut ilinniagaqarpoq maannali Aalborg Universitetimi psykologi ilinniarlugu.
Agathe Adolfsenip tupaatiginerpaavaa, danskit kammalaatigiit akunnerminni pissusilersuutaat.
- Naapissagaagamik ullorparujuit sioqqullugu pilersaarusioqqissaartarput.
Nunagisaq qimallugu ilinniagaqarneq unamminartupilussuugaluartoq, taamaattoq pissarsiffiulluartartoq Agathe Adolfsenip oqaatigaa, allallu taamaaliortarnissaannik inallugit.
- Naammagaittartariaqarpoq. Piffissaq atorluarlugu. Ingerlaannaq tunniutiinnaqinani. Ilaanni eqqarsartaraluarpunga saperlugu. Kisianni qarasaq oqartarpoq sapernagu, taannalu malikkaanni ajorneq ajorpoq.
Atuagaq Avalannerit, isumassarsiarineqarpoq, Aalborgimi kalaallit illuanni naapeqatigiinnermi. Namminersorlutik Oqartussat atuagaq aningaasaliiffigaat.
