Danmarkimi ilinniartitsisut uippakajaarnerulersut

Danmarkimi ilinniartitsisut suliffimminni atugassarititaasunik aamma ajornartorsiuteqarput, soorlu Kalaallit Nunaanni aamma taamaattoq.

København-imi meeqqat atuartut ukiup annersaani ilinniartitsisussaaleqisarput, tassa tamaani ilinniartitsisut nunap sinnerani ilinniartitsisoqatiminnit napparsimakulanerummata.

Københavnimi ilinniartitsisoq ataaseq ukiumut ulluni 17,3-ni agguaqatigiissillugu napparsimasarpoq, nunap sinnerani ilinniartitsisut napparsimasartut agguaqatigiissinnerat 13,3-lluni.

Nalunaarusiami assersuutigineqarpoq, Københavnimi, Aarhusimi, Odensemi, Aalborgimi, Esbjergimi, Randersimi, Gladsaxemi, Frederiksbergimi Fredericiamilu atuarfimmik ingerlatsineq qanoq akeqarnersoq.

Danmarkimi Ilinniartitsisut Kattuffiata siulittaasuata tulliata, Ole Hein Christensenip, ilinniartitsisut napparsimakulaarnerinut atuarfinni suliffiit ”silaannaluppallaarneri” peqqutaaqataanerarpai.

Kalaallit Nunaanni ilinniartitsisut suliffimminni atugarisaannik misissuinissaq, ilinniartitsisut Kattuffiata, IMAK-ip, sapaatip-akunnerani kingullermi ujartorpaa.