Danmarkimi ilinniarnissamut akuerineqarsimanerlutit internettimi takuuk

Kalaallit inuusuttaasa Danmarkimi ingerlaqqiffiusumik ilinniarnissamut akuerisaasimanerlutik internettikkut ippassaq unnukkut takusinnaalerpaat. Qinnuteqaatinut suliarinnittarneq maanna tamakkiisumik digitalinngorsarneqarsimavoq - kalaallit Danmarkimi ilinniarnernissamut akuerineqarsimanerannut aammalu tapiiffigineqarnissamik aaqqissuussinernut immikkut ittunut tunngatillugu.
Allattoq Niels Krogh Søndergaard, Simon Uldum
juulip 30-at 2013 10:31

Kalaallit inuusuttut Sjællandimi ilinniakkanut sivisunerusunut ukiormanna qinnuteqarsimasut 200-ngajaapput.

Nunanili allani ilinniarnissamik qinnuteqarsimasut siornatigumut naleqqiullugit ukiormanna affaannaapput. 30-t siorna nunani allani ilinnialernissamik qinnuteqarput, ukiormannalu 15-iullutik. Kalaallit Illuutaat Københavnimiittoq taama paasissutissiivoq, Kalaallit Nunaatali Danmarkillu avataanni ilinnialerusullutik qinnuteqarsimasut sooq affaannanngorsimanersut tassanngaanniit ilisimaneqanngilaq.

Ilinnialernissamik qinnuteqarsimasut www.kot.dk-mut isissapput, Nem-id-lu atorlugu appakaateriarunik ilinniarnissamut akuerineqarsimanerlutik takusinnaavaat. Ilinnialernissaq uppernarsassallugu eqqaamaneqassaaq. Sapaatit akunnerata ataatsip qaangiutinnginnerani uppernarsanngikkaanni ilinniarfimmi inissaq allamut tunniunneqassammat.

Nem-id-mik pigisaqanngikkuit, illoqarfiup ilinniarnissamik qinnuteqarfigisavit qanitaani Kalaallit Illuutaannut saaffiginnissaatit.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq