Danmarkimi ilinniarnertuunngorniat nunatsinnukarniarunnaarput
Ilinniarnertuunngorniat 28-t, Faaborgimi Gymnasiami 2.g-mut nooqqammersut, Nunatsinnut angalanissami tassani angalaqataasussaagaluarput. Uumassusililerineq, tassa biologii, qaffasissumik atuarpaat, nunarsuarmilu silap kiatsikkiartornera piffissami kingullermi sukumiisumik sammisarisimallugu, "Silap pissusaanik misissuisut inuusuttut"-nik taallutik taama sammisaqarlutik.
- Nunarsuarmi silap kiatsikkiartornerata inuusuttunut sunniutai ilinniartut Kalaallit Nunaannut angalanerminni assersuusiortussaagaluarpaat. Taamaaliunngikkunik klassiminni taamaallaat misissuisassagaluarput, klassip ilinniartitsisua, Nunatsinnullu angalanissamik isumassarsisoq, Peter Eduard, aviisip nittartagaanit issuarneqarpoq.
Filmiliortartunik aamma ilaasoqartussaagaluarpoq, aamma TV2-mi silasiortoq, Peter Tanev, angalaqataasussaaluarluni. Minutsinik 45-nik sivisussusilimmik filmiliortoqartussaagaluarpoq, taanna TV2-kkut aallakaatinneqartussaagaluarluni, atuartitsinermilu aamma atorneqartussaagaluarluni.
Angalanissamik isumassarsisut neriorsorneqarsimagaluarput tapiiffigineqarumaarlutik, aningaasarsiornikkulli ajornartoorneq pissutigalugu aningaasaliisussat arlallit tunuaannartariaqarsimapput.