Danmarkimi ilinniallissanerlutik paasissavaat
Allakkat Danmarkimiit arfininngormat nassiunneqarput, timmisartorlu Nunatsinnukartoq Danmarkimiit ullumi qangattarpoq, akissutillu sapaatip-akunnerata massuma ingerlanerani apuuffissaminnut apuutissangatinneqarput.
Danmarkimi ilinniarusullutik qinnuteqarsimasut ukioq manna 400-nit amerlanerupput.
Ilinniarnertuunngorniarfinni soraarummeernermi agguaqatigiissillugu 6,0 sinnerlugu karaktereqarsimagaanni Danmarkimi ilinnialertoqarsinnaassaaq, 6,0-imiilli appasinnerusumik karakterinnassimagaanni ilinniarfigerusutamut isersimanerluni kingusinnerusukkut aatsaat paasineqarsinnaalluni.
Qinnuteqarsimasut ikinnerpaamik affaat ilinniarfigerusutami aallartissinnaanissaat, Ilinniartunut siunnersortip Pia Rosing Heilmannip, Kalaallit Københavnimi Illuutaaneersup neriuutigaa.
- Ilinniarfigerusutamulli iserniarneq imaannaanngeqaaq. Karakterimmi agguaqatigiissillugit qaffasissuunissaat piumasaqaataavoq, Pia Rosing Heilmann oqarpoq.
