Danmarkimi H1N1-imik toqquteqartut marlunngorput
Angut 60-it missaannik ukiulik Hvidovremi napparsimmavissuup peruluttunnut uninngaviani ippassaani toquvoq. Angut alla 30-t missaannik ukioqartoq novembarip aqqaneq-aappaanni angerlarsimaffimmini Københavnimiittumi toquvoq.
Angutit taakkua toqusut ajorunnaarsinnaanngitsumik nappaateqarput tunillatsiasuullutillu.
Tunillatsiasuuneri pissutigalugit akiuussutissamik kapineqartut, peqqissutsimut aqutsisoqarfimmi pinaveersaartitsinermik pisortaq Else Smith oqarpoq.
Akiuussutissamik kapitinnermit ullut qulit qaangiukkaangata akiuussutissaq tamakkiisumik sunniuttarpoq, Else Smith oqarpoq. Angutit taakkua toqusut ajorunnaarsinnaanngitsumik nappaateqarnertik pissutigalugu akiuussutissamik kapineqarnermik kingorna ullut marluk qaanngiummata toqupput, Else Smthillu erseqqisarpaa akiuussutissap inummiit inummut sunniuttarnera assigiinngissinnaasoq.
Danmarkimi innuttaasut 100.000-it missaannik amerlassuseqartut nualluummik napparsimapput.
Sapaatit akunneri arlaqartut qaangiuppata nualluummik napparsimasut amerlanerpaaffissatik tikikkumaaraat, peqqissutsimut qullersaqarfimmit naatsorsuutigineqarpoq.
Niviarsiaraq Tasiilameersoq nualluummik H1N1-imik napparsimavoq, maannalu katsorsarneqareersimalerluni, taassuma saniatigut allanik nualluummik H1N1-imik napparsimasunik nammattoorsisoqanngitsoq peqqissutsimut qullersaqarfimmit nalunaarutigineqarpoq.
Flemming Kleist Stenz Nunatsinni nakorsaaneq oqarpoq, akiuussutissap sunniutai inummiit inummut assigiinngittartut, inuup nappaatinut akiuussutissaata tamakkiisumik ineriartortinneqarnera apeqqutaasarmat.
Akiuussutissamik kapitinnermit ullut 14-it qaangiukkaangata nualluummut H1N1-imut akiuussutissaq tamakkiisumik sunniuttarpoq.