Danmarkimi efterskolertussat aallartipput

Efterskolertussallu ilaat Nuunu Boassen oqaloqatigaarput:

- Qilanaaqaanga. Inunnik nutaanik naapitsinissara qilanaareqaara, Nuunu Boassen, Nuummeersoq oqarpoq.

Taanna Aarhusip avannaatungaani Risskovimi efterskolemi Sansestormernemi aqagu aallartissaaq.
Kalaallit inuusuttut 260-it missaat efterskolernissartik pillugu Danmarkimut sapaatip akunnerata siuliani tikipput, Nuunu Boassenilu taakkununnga ilaavoq:

- Misigisassarpassuaqartoq tusartarparput, ikinngutitaartortoqartarlunilu ilikkagassarpassuaqartartoq aamma tusartarlutigu. Angajoqqaallu qimallugit nammineernissaq aamma ilikkagaqarfiusartoq tusartarparput, Nuunu Boassen oqarpoq.

Angajoqqaanimi maqaasissanerpai?

- Aap, maqaasilaartassagunarpakka. Apeqqutissaqarangaama, oorimininnguanilluunniit amigaateqaraangama, Nuunu Boassen oqarpoq.

Efterskolemi taanna atisanik ilusilersuinermik aallutaqassaaq, saniatigullu sulorarnermik aamma aallutaqassalluni.
Danmarkip inuttussusia qununalaaraluarluni, aappaatigut aamma pilerinartuutinnerarpaa. Pingortitarsuarmut angalaarsinnaanissani maqaasinassangatippaa, illoqarfissuulli aamma periarfissai aamma pilerinartuutinnerarlugit.

Kalaallit Illui efterskolertussanik tikilluaqqusisartuupput efterskolernerallu aamma malinnaavigisarlugit, soorlu aamma siunnersuisartutut inissisimasut.
Nuunup angajoqqaani ilagalugit Danmarkiliarpoq, efterskolernissaminullu piareeqqalluni.

Kalaallit Nunaanni marlunnik efterskoleqarpoq, Qasigiannguani Maniitsumilu. Inissalli taakkunani killeqarmata Danmarkimi efterskolernissaminnut qinnuteqartartut amerlallutik.

Danmarkimi efterskolertut pingasuugaangata marluk Namminersorlutik Oqartussanit tapiiffigineqartarput.