Danmarkimi coronavirusimik toqquteqartut arfineq-marlunnik amerlisut – unitsinneqartut ikilisut
Danmarkimi coronavirusimik tunillatsissimasut napparsimmavimmut uninngasut 284-iupput. Taakku ataasinngornermi 310-usut 26-nik ikilipput.
Statens Serum Insitutimik kisitsisit taama takutitsipput.
Danmarkimi coronamik tunillatsissimanermi kingorna toqusut katillugit 434-upput, taakkulu ataasinngornermi arfineq-marlunnik ikinnerullutik.
Coronamilli tunillatsissimallutik toqusut ilumut nappaat taanna toqqutigineraat qularnarpoq. Coronamik tunillatsissimasutut paasineqarnermi kingorna ullut 60-inngortinnagit toqusut naatsorsuinermut ilaatinneqartarput.
Coronavirusimik tunillatsissimasut napparsimmavimmut unitsinneqartut ikilipput, taakku sapaammit ataasinngornermut 25-nik amerligaluarput.
Napparsimmavimmi uninngasunit 66-it peruluttut uninngavianniipput, 50-illu anersaartuuteqartinneqarlutik.
Kisitsisit taakku ataasinngornermi 72-iullunilu 55-iugaluarpoq. Taamaammat tassani aamma ikilisoqarpoq.
AAMMA ATUARUK Nu er der over tre millioner bekræftede coronasmittede i verden
Napparsimmavimmut unitsinneqartut apriilip ulluisa aallaqqaataanni 535-ullutik amerlanerpaagamilli ikiliartorput.
Napparsimmavinni uninngasut amerlanerpaartaat nunap immikkoortuani illoqarfiit pingaarnersaanniipput, tassani 157-it uninngapput. Nunap immikkoortuanut Nordjyllandimut sanilliukkaanni tassani uninngasut 12-iipput, tassanilu unitsinneqarsimasut Danmarkimi nunap immikkoortuinit tallimanit ikinnerpaallutik.
Danmarkimi tunillatsissimasunit 6121-t oqartussat taaguutigisaattut, nappaammik qaangiisimapput.
Oqartussat coronamik tunillatsissimasutut peqqisseqqittunik taagunngilaat. Nappaammik qaangiisimaneq isumaqarpoq tunillatsissimanermit ullut 14-it ingerlaneranni napparsimmavimmut unitsinneqarsimanngitsut toqusimanngitsullu.
Danmarkimi coronavirusimik tunillatsissimasut katillugit 8851-it paasineqarnikuupput. Taakkulu ataasinngornermit 153-inik amerlillutik.
Danmarkimi coronavirusimik tunillatsissimasunit toqusut 4,9 procentiupput.
Danmarkimi tunillatsissimallutik uppernarsarneqanngitsut amerlanerungaatsiassangatinneqarput, taamaammat nappaatip toqussutigineqartarneranut procenti appasinnerussangatinneqarpoq.
AAMMA ATUARUK Tamaat isigalugu: Coronavirus pillugu killiffik
Danmarkimi inuit katillugit 166.846-it coronavirusimut misissorneqarnikuupput. Oqartussat periutsimik tassa ersiuteqartut tamarmik misissorneqartarnissaannik periuseqalernerata kingunerisaanik ullormut misissorneqartartut amerliartulerput.
Amerlanerusut misissorneqareerneratigut tunillatsissimasut ilumut qasserpiaanersut naatsorsoruminarnerulissapput.
Amerlanerusulli misissorneqalernerat pissutigalugu innuttaasut akissutersinissaminnut utaqqinerulernertik ilaasa malugaat.
/ritzau/