Danmarkimi coronaviruseqartut 350-it napparsimmavimmi uninngasut

Coronaviruseqartut 350-it napparsimmavinni pingasunngornermi uninngapput. Statens Serum Institutip kisitsisaataasa kingulliit tamanna takutippaat. Virus pissutigalugu uninngasut marlunngornermi 301-iupput.

Inuit coronaviruseqartut maannamut 34-t toqupput. Marlunngornermit taakku marlunnik amerlanerupput.

Uninngasunit 350-init 87-it peruluttut uninngavianniipput. Taakkunanngalu 76-it anersaartuutilerneqartariaqarlutik.

AAMMA ATUARUK Coronavirusimik Danmarkimi toqquteqartut 32-nngortut

Peruluttut uninngavianniittut uninngasullu anersaartuuteqartariaqartut marlunngornermit amerlanerupput. Marlunngornermi 69-it peruluttut uninngavianniipput, 58-illu anersaartuut aqqutigalugu saniaitigut silaannalersorneqartariaqarlutik.

Danskit 1715-it coronavirusimik tunillatsissimasut pingasunngornermi uppernarsarneqarpoq. Taakku marlunngornermut sanilliullugit 138-nik amerlanerupput.

Tunillatsissimasut amerlanerungaatsiarnissaat ilisimagineqarpoq, pissutigalugu inuit sakkortunerusumik ersiuteqartut kisimik misissorneqarnikuummata.

Inuit 14-870-it coronavirusimut maanna misissorneqarsimapput. Tassa imaappoq misissorneqartunit tamarmik 12 procentit tunillatsissimasut paasineqarpoq.

Tunillatsissimasutut paasineqartut suli annermik angutaapput. Tunillatsissimasutut uppernarsarneqartut 1715-iusut 60 procentii angutaapput.