Danmarki nunarsuaq tamakkerlugu tunillaassuuttoqarnerani sapaatini akunnerni siullerniippoq, tunillatsittullu poorskip kingorna sapaatip-akunnera 16-imi amerlanerpaalernissaat naatsorsuutigineqarpoq.Assi: Henning Bagger/Ritzau Scanpix

Danmarkimi coronaviruseqarlutik toqusut 41-pput – 386-illu napparsimmavimmi uninngallutik

Danmarkimi coronavirusimik toqquteqartut 41-pput, taakkunannga arfineq-marluk kingullermit naatsorsuinerup kingornaneersuupput. Tamatuma saniatigut napparsimmavimmut unitsinneqartut amerlipput.

Danmarkimi coronavirusimik napparsimasut 41-t maanna toqupput.

Kisitsit naatsorsuinermi kingullermi 34-uvoq. Statens Serum Institutip naatsorsuinerata tamanna takutippaa.

Naak 41-t coronaviruseqarnerminni toqugaluartut tamanna toqqutaasutut isumaqartariaqanngilaq.

Virusimik tunillatsinnermit ullut 60-it qaangiutsinnagit toqusut naatsorsueqqissaarnermi tamanna toqqutaasutut ilaatinneqartarpoq.

Toqusut amerlanerunerisa saniatigut Danmarkimi napparsimmavinnut unitsinneqartut amerliartorput, kisitsilli qaffakkiartornera ullunut kingullernut sanilliullugu annikinneruvoq.

Napparsimasut coronaviruseqartut napparsimmavimmut unitsinneqartut sisamanngornermi 36-nik amerlillutik 386-inngorput.

AAMMA ATUARUK Danmarkimi coronaviruseqartut 350-it napparsimmavimmi uninngasut

Napparsimmavimmi uninngasunit 94-it peqqinngingaaramik peruluttut inaanniipput, taakkunanngalu 78-it anersaartuuteqartariaqarlutik.

Coronavirusimik tunillatsittut, napparsimmavimmi uninngasut toqusullu amerlanerulernissaat oqartussat naatsorsuutigisaata nalaanniipput.

Danmarki nunarsuaq tamakkerlugu tunillaassuuttoqarnerani sapaatini akunnerni siullerniippoq, tunillatsittullu poorskip kingorna sapaatip-akunnera 16-imi amerlanerpaalernissaat naatsorsuutigineqarpoq.

Folketingilli suliniuterpassuisa qanoq sunniuteqarnissaat apeqqutaalluinnarmata tamanna qulakkeerlugu uppernarsarneqanngilaq.

Danmarkimili tunillatsissimasut napparsimmavimmullu unitsinneqartut amerliartornerat pissutigalugu napparsimmavinni sapaatini-akunnerni aggersuni kipiluttunartorsiortoqarnissaa naatsorsuutigineqarpoq.

/ritzau/

Isummersuutit