Danmarkimi coronamik sapaatini-akunnerni arfinilinni toqquteqartut aatsaat taama ikitsigisut

Danmarkimi coronamik toqusut marsip 25-anili aatsaat taama ikitsigisut. Napparsimmavimmut unitsinneqarsimasut ikilillutik 209-nngorput.
Inersimasut imminnut ungasillisimaaginnarunik eqqiluisaaginnarunillu napparsimmavinnut unitsinneqartut ikiliartuinnarnerannut unikaallatsitsitinnagit taakku ammaqqinneqarsinnaassapput. Assi © : Nicolas Asfouri/AFP/Ritzau Scanpix
Allattoq Ritzau
maajip 06-at 2020 12:58
Nutserisoq Connie Fontain

Danmarkimi coronamik tunillatsissimanermi kingorna toqusut sapaatini-akunnerni arfinilinni aatsaat taama ikitsigisut pingasunngornermi nalunaarsorneqarput.

Coronamik tunillatsissimanermi kingorna toqusut katillugit 506-iupput, taakkulu marlunngornermit pingasunik amerlanerullutik. Statens Serum Insitut (SSI) taama paasissutissiivoq.

Ullormut toqusutut nalunaarsorneqartartut, marsip ulluisa 25-anili nalunaarsorneqartaleranik aatsaat taama ikitsigipput, taamani inuit marluk ullormut toqupput.

Danskit oqartussaasuisa toqusunik nalunaarsuineranni kinguartoortoqartarunnaarnikuuvoq.

Toqusut taama ikitsiginerisa saniatigut coronavirusimik tunillatsissimasut napparsimmavimmut unitsinneqartut 19-inik ikilillutik 209-nngorput.

Danskit napparsimmaviinut unitsinneqartut marsip naanerani amerlanerpaapput, tamatumalu kingorna ikiliartuinnarsimallutik.

AAMMA ATUARUK Danskit naalakkersuisui 197 milliardit koruuninik amigartuussangasut

Napparsimmavimmut unitsinneqarsimasunit 46-t peruluttut uninngavianniipput, taakkulu marlunngonrermit pingasunik ikinnerullutik. Peruluttut uninngavianniittunit 41-t anersaartuuteqartinneqarput.

Danmarkimi kisitsisit taamaannerat pissutigalugu Folketingimi partiit inuiaqatigiit ilaannut maajip ulluisa qulingata kingorna ammaaneroqqinnissartik isumaqatigiinniutigisussanngorpaat.

Statens Serum Institutip (SSI) isumaqatigiinniartoqarnissaa sioqqullugu assigiinngitsunik ammaaqqittoqarnissaanut qanoq pisoqarsinnaaneanik naatsorsuinerit saqqummiuppai.

Sumiiffiit qassiiusut ammaqqinneqaraluarpataluunniit coronavirusimik tuniluuttoqarunnaarsinnaasoq ataatsimut isigalugu nalilerneqarpoq.

Pisiniarfissuit, inuuniutigalugu timersornerit isiginnaartoqartinnagit, atuakkanik atorniartarfiit, uumasuusiviit, pisortat suliffeqarfii soorlu Illersornissaqarfik Sulinermillu nakkutilliiviup qanoq ammaqqinneqarnissaanut tunngaviusumik qanoq pisoqarnissaanut naatsorsuusiortoqarpoq.

Tamatuma saniatigut arlalippassuarnik allanik ammaasoqarnissaanut naatsorsuusiortoqarpoq.

6. Klassiniit 10. klassinut atuartut atualeqqinnissaaq kiisalu efterskolit, neriniartarfiit, cafét ammaqqinnissaannik – suliffeqarfiillu namminersortut angerlarsimaffimminni sulisariaqarunnaarnissaannik taakku ilaqarput.

Inersimasut imminnut ungasillisimaaginnarunik eqqiluisaaginnarunillu napparsimmavinnut unitsinneqartut ikiliartuinnarnerannut unikaallatsitsitinnagit taakku ammaqqinneqarsinnaassapput.

AAMMA ATUARUK Europap ammariartoqqinnerani kiinnamut assiaquteqarnissaq piumasaqaataalertoq

Inersimasut imminnut ungasillisimaaginnanngikkunik eqqiluisaagikkunillu unitsinneqartartut annertunngitsumik amerlisinnaapput.

Naatsorsuinerit kisitsinermi periutsit atorlugit suliarineqartut SSI-p erseqqissaatigaa, taamaammat tamatumunnga atatillugu qularnartoqangaatsiartoqarpoq, taamaammallu kukkusoqarsinnaalluni.

Statens Serum Institutittaaq ukiup ingerlanerani nutaamik tuniluuttoqaleratarsinnaaneranut aarlerinartoqartoq aamma nalilerpaa.

/ritzau/