Danmarkimi naalagiartitsinerit tamarmik danskisut kisimi ingerlanneqarsinnaanerat kukkuneruvoq. Biskoppit qassiiusut danskit naalakkersuisuinut allagaqartut taama isumaqarput.Assi: Rufo Correa Calvillo/Flickr Creative Commons

Danmarkimi biskoppit danskisuinnaq naalagiartitsisalernissaq akerlerigaat

Biskoppit arlallit Danmarkimi soorlu tyskisut, kalaallisut savalimmiormiutulluunniit naalagiartitsinerit inerteqqutigineqarnissaannik siunnersuut isornartorsiorpaat.

- Inatsisissatut siunnersuut akuerineqassappat danskit inuiaat allat ilitsoqqussaralugit oqaasiinik apeqqusiinerannik ersersitsinerussaaq, apeqqusiinissaminnullu tunngavissaqanngissoraavut.

Danmarkimi Københavnimi, Ribemi Haderslev Stiftimi biskoppit pingasut Tysklandimilu Schlesvig-Holsteinimi biskoppi danskit naalakkersuisuinut allakkatigut taama suaaruteqarput.

AAMMA ATUARUK Danskit oqaluffiini kalaallisut naalagiartitsisarneq aarlerinartorsiorsinnaasoq

Taakku danskit naalakkersuisa Danmarkimi upperisani tamani naalagiartitsinerit tamarmik danskisuunngikkunik minnerpaamilluunniit danskisuumut nutserneqarnissaannik siunnersuutaat akerlerisupilussuuaat.

Siunnersuut upperisat ataasiakkaat qinngarsuinissamut, assigiinngisitsinissamut peqqarniisaarniarnissamullu kajumissaarinissaannik, danskit naalakkersuisuisa oqarnerat naapertorlugu, pinaveersaatitsissutaassaaq. Danskisuinnaq naalagiartitsisoqartalerpat tamat paasinninnerannik isertuaatsuunerannillu kinguneqassasoq, danskit naalakkersuisui isumaqarput.

Siunnersuulli Danmarkimi inuiaat ikinnerussuteqartut assigiinngitsorpaaluit ilagiivisa, soorlu tyskit ilagiivisa namminersortut, naqisimaneqarnerannut ilapittuutaassasoq, biskoppit isumaqarput. Akuerineqassappullu Sønderjyllandip Danmarkillu kattuteqqinnerisa ukioq manna malunnartinneqarnerani pissaaq.

- Inatsisissatut siunnersuut Danmarkip ilaani tyskit oqaasiinik ajattuisoq Sønderjyllandip Danmarkillu ukiut hunnorujut matuma siorna kattuteqqinnerisa malunnartinneqarnerani akuerineqassappat, tamanna puiukkiunneqartussamik quiassuarniliornerussaaq.

Siunnersuut akerlerineqangaatsiartoq

Taakku killeqarfiup eqqaamiut peqatigiiffiannit, danskit tyskillu killeqarfiannut atatillugu qanimut suleqatigiittunit tapernerneqarput.

Upperisaq oqaatsit pikkorinneruffiusut atorlugit ersersikkuminarnerusartoq taassuma Kristelig Dagbladimi atuartartut allagaatigut  erseqqissaatigaa.

- Ilitsoqqussaralugu oqaatsit uummammit oqaasiupput. Danskinut kisimi atuutinngilaq, allanulli aamma taamaalluni.

AAMMA ATUARUK Danmarkimi kalaallit palasissaat: Kalaallit danskisut naalagiartalissappata eqqumiissaaq

Aamma kalaallit ilagiivinit Danmarkimi palasinngoqqammersup, Marianne Lynge Kroghip malittarisassaq kalaallisut naalagiartitsisarnermut isumassaarutsitsissasoq erseqqissaatigaa.

-  Kalaallisummi naalagiartitsisoqartarnissaa siunertaralugu kalaallimik palaseqartitsipput. Taamaaliortoqanngippammi danskisut naalagiaannartarsinaammata, palasi KNR-imut oqarpoq.

Kalaallit Danmarkimi Ilagiivinit oqaaseqartartup, Charlotte Nebel Pedersenip siunnersuut "quianarluinnartuunerarpaa".

Aamma nunat avannarliit folketingimut ilaasortaatitaasa, Savalimmiuni Javnaðarflokkurinimeersup Sjúrður Skaalep  aamma Inuit Ataqatigiinnit Aaja Chemnitz Larsenip siunnersuut isornartorsiorpaat. Venstrep aamma isornartorsiorpaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat