Danmarkimi aviisit Kuupik Kleistip saassuppai
Danmarkimi aviisimi Politikenimi qulequtaq imaattoq ippassaanikkunni atuarneqarsinnaavoq: "Kalaallit Nunaanni siunissaq taartuinnaagunarpoq", allaatigisami pingaarnermi tassani Lars Trier Mogensen, tassani eqqarsaatersorluni allappoq, uuliamik nassaartoqassagaluarpat Kalaallit Nunaat "petro-regime"itut, tassa petruuliu, uulia gassilu taamaallaat naalakkersuiffigalugit inississanersoq, Lars Trier Mogensenip allanneratuut "peqquserluttumik, "equngasumik" "naalagaaniartutullu" pissusilersortunut taamaalilluni ilanngutissanersoq, tassa annerusumik minnerusumilluunniit anneruniartunut ilaalerluni.
Isornartorsiuineq tamanna aviisimi Politikenimi Naalakkersuisut siulittaasuata aviisimi akissuteqarfigaa.
Cairn Energyp misiliilluni uuliamik qillerinera pillugu Politikenip samminninnera kusanannginnerarpaa, "imminut killilersinnaannginnerarpaa", aamma isumaqarluni, Mogensenip allaaserisaani takuneqarsinnaasoq "ilisimasaqanngivissoq".
Uuliamik nassaartoqassagaluarpat kalaallit demokratiiata innarlerneqarnissaa Kuupik Kleistip ilutigalugu aamma upperinngilaa, nunanummi allanut uuliaatilissuarnut naleqqiullugu uuliamik nassaartoqannginnerani demokratiskiummat.
Kalaallit Nunaata uuliamiinnaq isertitsisarnissaa Naalakkersuisut siulittaasuata aamma ernummatiginngilaa.
Uuliamimmi isertitanit aningaasaateqarfeqalissappat tamanna pinavianngilaq, Kuupik Kleist tikkuaavoq.
