Danmarkimi atugarliortut sisamassaannik aningaasaliiffiginiarneqanngitsut
Kalaallit ornittagaat Perput Aalborgimiittoq, Kammak II Århusimiittoq, kiisalu Danmarkip kujataani Kalaallit atugarliortunut suliniut januarimi tamarmik matusimanissaat naatsorsuutigineqarpoq.
Tamarmimmi Kalaallinut atugarliortunut suliniutaannut aningaasanik tungiuinermut ministeriaqarfimmut tapiiffigiteqqugaluarmata itigartinneqarsimapput.
Itigartitsinneqartullumi taamatut aaliangernermut eqqumiiginnikkaluaqaat, Danmarkimimi Kalaallit atugarliortut maanna naalakkersuisuusunit annertunermik tapersersorneqarumallutik neriorsorneqareeraluarmata.
- Suliniutitta sivitsoqqinneqarnissaat neriuutigigaluarsimavarput. Ilami Kalaallit Folketingimi ilaasortaatitaasa Tungiuinermullu Ministeriaqarfiup oqaloqatigiinnerata isumallualersissimagaluarmatigut.
Sunaaffali asuli.
Jan Thrysøe, Aalborgimi Kalaallit Illuanni ittuusoq taama oqaaseqariarluni Danmarkimi kalaallit illuini qullersaasut allat assigalugit isumalluarpalaarnerulluni ima oqaaseqaqqippoq:
- Ukiaruli Folketingimi qaqileqqinneqassasoq tusarparput, taamaamma isumalluarpugut suliniutittalu ingerlateqqilernissaat neriuutigalutigu, arlaatigulli ingerlariartoqaqqinngippat akissaarutissaagut suliniutivullu tamaasa 2012-ip naalernerani unitsittariaqassallutigit.
Tassa Kalaallit atugarliortunut suliniutit matusariaqalissappata Perput Aalborgimiittumi sulisut soraarsinneqartariaqassapput inillu attartorneqartut tamarmik qimanneqartariaqassallutik.
Taamaakkaluartorli kikkut tamarmik aningaasanik tapiiffigineqarnissaq neriuutigaat, suliniutillu taamaasillutik ingerlatiinnarneqarsinnaalissagaluarlutik.
Nunarput sinnerlugu Folketingimi ilaasortat tamarmik Tungiuinermut ministerimut suliaq qaqilereerpaat.
Ministerillumi akissuteqarnerani aappaagu 2013-imi atugarliortunut aningaasaliissutissat isumaqatigiinniutigineqalerpata Kalaallinut suliniutit aningaasaqarnermut inatsisimut ilanngunneqarsinnaassanersut isummerfigineqarumaarpoq.
Sapaatillu akunnerani kingullermi naggataarutaasumik Folketingimi oqallittoqarmat Kalaallit erloqissutaat pillugit Ministeriuneq Helle Thorning-Schmidt ima oqaasieqarpoq.
- Sara Olsvig oqaaseqarmat Danmarkimi Kalaallit Illuisa qanoriliuuseqarfigineqarnissaat kissaatigivaa, taakkummatami Danmarkimi Kalaallinut ikiuisartuusut.
- Kissaatigisaalumi isumassarsiatsialaasoraarput, atugarliortunullu aningaasaliissutigisartakkatsinnut taputartuunneqarsinnaaneri ukiaru isumaqatigiinniutigineqarsinnaasutut isumaqarfigalutigu,Helle Thorning-Schmidt taama oqarpoq.
Danmarkimi Kalaallit Illuisa ingerlanneqarnissaanut aningaasartuutissat Qallunaat naalagaaffiata matussusertarpai.
Kalaallit Illuisali atugarliortunut suliniutai naalagaaffiup atugarliortunut tapiissutigisartagaat aqqutigalugit ingerlanneqartarput, tapiissutaasartulli piffissaq killilerneqarsimasumi tunniunneqartarput, tapiissutaasartullu unitsinneqaraangata allatigut, soorlu kommunit aqqutigalugit aningaasalersorneqartariaqalersarlutik.
