Danmarkimi AstraZenecameersumik akiuussuserneqareerluni toqusumut qanigisaasut taarsiiffigineqaqqusut
AstraZenecameersumik coronamut akiuussuserneqareerluni nassuiaruminaatsumik taqqamikkut milittoornermik oqartussat toqquteqarsorisimasaat pillugu taarsiiffigeqqunermut suliaq siulleq Danmarkimi aallartittoq, aviisi Jyllands-Posten allappoq.
Danmarkimi inuit soorlu nakorsaatitornerminnut atatillugu kingunerluuteqarujussuarsimasut taarsiiffigineqaqqusut pillugit suliaqartartoq, Patienterstatningen taama ilisimatitsivoq.
AAMMA ATUARUK Akiuussutissaq AstraZeneca Danmarkimi atorneqarunnaartoq
Inuit Astrazenecameersumik akiuussuserneqareerlutik taarsiivigineqarnissamik qinnuteqartut maannamut 29-upput. Tamatumalu saniatigut Pfizerimeersumik akiuussuserneqareerlutik taarsiiffigineqaqqusut arfineq-pingasuupput. Modernameersumik akiuussuserneqarsimasut taarsiiffigineqaqqusunik ilaqanngillat.
AstraZenecap akiuussutissaliaa Danmarkimi atorneqarunnaassasoq, danskit peqqinnissamut aqutsisoqarfiata pisortaa Søren Brostrøm tusagassiortunik pingasunngornermi katersortitsinermi nalunaarpoq.
Nassuiaruminaatsumimmi taqqakkut milittoorsimasut AstraZenecameersumik akiuussuserneqarnerannut attuumassuteqartoq uppernarsineqaqqammerpoq.