Danmarkimi aningaasanut aappaagumut inatsisissaq siullermeerneqalerpoq. Kalaallit Nunaannut kinguneqaratarsinnaavoq

Danmarkimi aningaasanut aappaagu inatsisissap siullermeerneqarnera Folketingimi ullumi aallartippoq. Naalakkersuisut Dansk Folkepartimut kingumut tuloqqissanerpat, imaluunniit Aningaasarsiornermut ministerip, Thor Petersenip, aningaasartuutissanut inatsit imartooq partiinut akueritissinnaassanerpaa, tamanna qaammatini tulliuttuni paasinarsiumaarpoq.

Dansk Folkepartip piumasaqaatini iluatsissappagit, tamanna Kalaallit Nunaannut kinguneqaratarsinnaavoq. Partiimmi Naalakkersuisut tapersersortigilluagaata piumasaqaatigaa, naalagaaffimmit tapiissutit nakkutigineqarnerisa annertusineqarnissaat, aningaasanullu inatsimmut siunnersuutinut sipaarutissanut tapitartuunneqarnissaat. Taama piumasaqarnermut pissutaavoq, ilassinninnermut aningaasartuutinik Naalakkersuisut atornerluisimanerat qulaajarneqareersorlu. Piumasaqaatertik Dansk Folkepartiip angunngikkunillu, naalagaaffimmit tapiissutit annikillisinneqarnissaat partiip piareersimaffigaa.

-Naalagaaffiup aningaasartuutaanik kukkunersiuisartut annertunerusumik nakkutilliinissaminnut periarfissinneqarsinnaappata tapersersuissanersugut paasinarsiumaarpoq. Kalaallinulli 50.000-inut 2,5 milliardi koruunit aamma ajoriinnagassaanngillat, Kristian Thulesen-Dahl aviisimut Kristeligt Dagbladimut sapaatip-akunnerani kingullermi oqarpoq.

Naalagaaffimmit tapiissutit 800 millioni koruuninik ikilisinneqarnissaat partiip tassa piareersimaffigaa. Malinnaasulli nalilerpaat, naalagaaffimmit tapiissutit ikilisinneqarnissaat amerlanerussuteqartut tapersersussagunanngikkaat.