Danskit oqartussaasuisa anersaartuutinut illersuutit atornissaannik innersuussuteqarnissaq nunani allani oqartussaasunit tunuarsimaarfiginerusimavaat.Assi: Scanpix

Danmarkimi angallatileruttorfimmi anersaartuutinut illersuuteqartoqaqqusaasoq

Piumasaqaataanngilaq innersuussutaavorli. Taamaammat anersaartuutinut illersuuteqartoqanngikkuni aamma akiligassiisoqarnavianngilaq.

Aasaanerani suliffinngiffeqarneq qaangiutilerpoq, ulluinnaallu qalliartorlutik. Taamaammat amerlanerusut ataatsimoorussamik angallaviusut aamma atortalissavaat.

Taamaammat bussini, qimuttuitsuni metronilu inuttulluni ungasissusissatut innersuussutaasoq malinneqarsinnaanngippat anersaartuutinut illersuuteqartoqarnissaa, peqqinnissamut aqutsisoqarfiup pisortatigoortumik maanna kaammattuutigaa.

Aqutsisoqarfik tusagassiuutinut nalunaarummi paasissutissiivoq.

- Piffippassuarni ungasillisimaarnissaq malikkusukkaluarlugu tamanna ajornakusoorsinnaavoq. Matumani angallatileruttorfimmi assersuutigalugu ataatsimoorussamik angallaviusut imaluunniit bussit, qimuttuitsut ikaartaat inuttuut pineqarput, peqqinnissamut aqutsisoqarfiup pisortaa, Søren Brostrøm oqarpoq.

- Taamaammat piffinnut taakkununnga anersaartuutinut illersuummik nassataqartoqartarnissaa ungasillisimaarnissarlu ajornakusooraangat atisarnissaat maanna innersuussutigaarput.

Angallatsitsisut paasissutissiissasut

Piumasaqaataanngilaq innersuussutaavorli. Taamaammat anersaartuutinut illersuuteqartoqanngikkuni aamma akiligassiisoqarnavianngitsoq, angallannermut ministeri, Benny Engelbrecht oqarpoq.

- Angallatsitsiviilli ilaasartunut soorunami paasissutissiilluarnissaq isumagissavaat. Pingaartumik piffissami maannakkut kikkut tamarmik sulinngiffeqareerlutik utikaaneranni. Sungiussilluartoqalaarnissaa pitsaalluinnarpoq, taanna oqarpoq.

AAMMA ATUARUK Nunatsinniit nunatsinnullu angallanneq: Qanermut assiaqut, immersugassaq-Sumut misissortinnerlu

- Innersuussutit inuiaqatigiit piffissamut inuit amerlanerusut angallaviusuni ataatsimoorussaniittalerlutik nalinginnaasumut uteqqivinnginneranni takkunnerat pitsaavoq.

Tamat orniguffigisinnaasaanni anersaartuutinut illersuuteqartoqarani angalasinnaasut peqqinnissamut aqutsisoqarfiup naliliinera suli atuuppoq.

Anersaartuutinut illersuutit tunuarsimaassutigigaat

Danskit oqartussaasuisa anersaartuutinut illersuutit atornissaannik innersuussuteqarnissaq nunani allani oqartussaasunit tunuarsimaarfiginerusimavaat.

Danskit tamat orniguffigisinnaasaanni anersaartuutinut illersuuteqartoqartalernissaa nunat qassiiusut piumasaqaatigilereeraallu takorloorsinnaaleriartussagaat immikkut ilisimasallit qassiiusut siulittuutiginikuuaat.

Peqqinnissamulli aqutsisoqarfiup pisortaata, Søren Brostrømip anersaartuutinut illersuutit tamat orniguffigisinnaasaanni atorneqarnissaat ”piffissami matumani isumassaqanngitsoq” DR-imut ippassaq unnukkut oqaatigaa.

Isummersuutit