Danmarkimi aalisarneq kunngeeqqanit aqunneqarpoq
Aalisakkanik pisassiissutinik tunisisinnaalernerup Folketingemi 2003-mi 2006-imilu aammaanneqarnerata kinguneranik danskit naalagaaffiannit akiliinatik aalisagartassinneqarsimasut aalisagartassiissutitik iluanaarutigisinnaalersimavaat.
Aalisartut ilaasa aalisagartassiissutinik tuniniaasinnaanngorneq atorluarlugu aalisartuujunnaarlutik aalisagartassiissutinik tuniniaasunngorsimapput, millionilikkanik isertitsissutigisaminnik, ilaallu aningaaserivinnit taarsigassarseriarlutik aalisagartassiissutinik angisuunik pisiortulersimapput.
Aviisip Jyllands-Postenip tamanna misissorsimavaa, paasisaasalu ilagaat Danmarkimi aalisariutit akisunersaannik taaneqarsinnaasoq.
Aalisariut 67 meterisut takitigisoq "Isafold" Hirtshalsimeersoq, aalisagartassiissutinik pisiortorsimavoq. Aalisariut ullumikkut pisiarineqassaguni 1 milliard koruunit nalinginut aatsaat pisiarineqarsinnaavoq. Aalisariullu taanna nunarsuatsinni containerinik assartuutit annersaannit allaat nalituneruvoq.
"Isafold" ammassassuarnik, makrelinik aalisakkanillu suliffissuarni suliassanik aalisariutaavoq. Tamakkuninngalu aalisarneq isertitsiffiunerpaasarpoq.
Aviisi Jyllands-Posteni naapertorlugu aalisariutit annerit arfineq-pingasut 4,8 milliardit koruunit nalinngannut aalisagartassaqarput, tassalu Danmarkimi aalisakkat 2010-mi tulaanneqartut sisamararterutaat.
Danmarkimi aalisartut peqatigiiffianni siulittaasuusimasup Bent Rullep ineriartorneq ajuusaarutigaa:
" Aalisartut aalisarnerlu tunulliullugit aningaasannanniarneq salliutinneqalersimavoq, aalisartoqarfeeqqallu tamarmik sequminneqarput. Tamannalu kanngunarpoq."
Allalli isumaqarput aalisagartassiissutinik tunisisinnaalernerup Danmarkimi aalisariutit aalisagartassallu naleqqatigiinnerulernerannik kinguneqarsimasoq, Aviisi Jyllands-Posteni naapertorlugu EU-Kommissionip periuseq tamanna Europami aalisarnermut tamanut atuutsinnialerpaa.
