Danmarkimi 50.000-it akerliussutsimik takutitsisut
Danmarkimi innuttaasut tusindilikkuutaat atugarissaarneq pillugu naalakkersuisut aaqqissuusseqqinnissamik siunnersuutaat ernummatigalugu akerliussutsimik takutitsillutik ingerlaaqatigiipput.
DR-ip tusagassiortua Christian Howard Jessen Christiansborgimi 50.000-t missaani ingerlaaqatigiittut akornannit ima oqaluttuarpoq:
-Ukiuni 25-ini tusagassiortuuninni aatsaat taama inuit assigiinngiiaartigisut naammattoorpakka. Inuusuttut ilinniagaqarnermusiallit, utoqqalinersiutillit kiisalu nuna allamiut tapiissutisisartut tamarmik ataatsimoorlutik tamani tamaani takussaapput tamarmillu Danmarkimi naalakkersuisut atugarissaaneq pillugu siunnersuutaannut akerliunertik takutippaat, allagartarsuartigut oqalugiarnertigullu. Naalakkersuinermik suliaqartut arlallit saneqquppaannga. Aatsaaginnaq Socialdemokratini ilaasortaq Mogens Lykketoft saneqquppoq. Helle Thorning Schmidt akooriarluni iseriartortoq takuara. Dansk Folkepartiineersut arlallit anillannissartik ernumagigamikku anillanngillat. Inatsisissatut siunnersuut illoqarfippassuarni, soorlu Københavnimi akerliuffigineqaraluaqisoq qanorpiaq Christiansborgimi aalajangiiffigineqassanersoq pissanganarpoq, Christian Howard Jessen naggasiivoq.
