Danmarki politiinut unnerluutigaa

Danmark arfernik toqoraasutut politiinut unnerluutigineqarpoq. Politiinut suliassanngortitsisup isumaa malillugu Danmarkimi oqartussat assaat aaginnaapput, pissutigalugu Savalimmiut niisarnarniartarnerat akerlerinagu akuersaaginnaramikku, taama Politiken.dk allaaserinnippoq.
Allattoq Najaaraq Egede
septembarip 01-at 2010 14:16

Avatangiisinik illersuiniaqatigiinni suleqataasoq ima tunngavilersuivoq:

- Isumaqarpunga alianarluinnartuusoq, niisarnat ilaqutariiaarlutik Sikuiuitsumut Kujallermut piarartaariartorlutik ingerlaartut Savalimmiunut pineranni tamakkerlugit toqorarneqartarnerat, Peter Mathos, Avatangiisinik Illersuiniaqatigiiffimmi Sea Shepherd Conservation Society-mi piumassutsimik suleqataasoq oqarpoq.

Mathos Politikenimut oqarpoq, ilimagilluinnarlugu politiinut suliassanngortitsinini ingerlaqqinnavianngitsoq, pingaartumik eqqarsaatigigaanni EU-p avatangiisinut kommissæriata arfanniarnermut tunngatillugu uparuaanerit tusaaneq ajormagit. EU-kommissærimi isumaqarpoq, arfanniarsinnaanerit akuerisaareersut politiinut suliassanngortittariaqanngitsut.

- Aap, taamaakkaluarpoq, kisianni uanga inatsisit kisiisa eqqarsaatiginngilakka, oqarpoq nangillunilu.

- Eqqumiiginarsinnaavormi, puulukit usisaassuarnut ikitillugit assersuutigalugu nunanut allanut assartorneqarnerminni sivisujaamik orsersortarfiit eqqaanni ingerlaqqinnissamut utaqqitinneqaraangata nalligineqartarnerat, uffa illuatungaani imarmiut, niisarnat, ilaqutariiaat nungullugit Savalimmiuni toqorarneqartarnerat assuarineqanngitsoq, Peter Mathos oqarpoq.

Taamaammat aamma Savalimmiormiut niisarnarniarnermik kultureqarnerannik oqaluttarneq, soorlu Kalaallit Nunaat aamma arfanniarnermik kutureqarnerarneqartartoq, asuli pinertut nalilerusuppai.

- Nunani tamalaani kulturit ileqqullu immikkuullarissut ataqqisorujussuuakka, kisianni Savalimmiuni niisarnarniartarneq asuleerneruallaaqaaq, Peter Manthos oqarpoq.