Danmarki nutaamik ministeriunertaarpoq

Aningaasaqarnermut ministeriugaluartup Lars Løkke Rasmussenip nalunaaquttap akunneri arlaqanngitsut matuma siornagut Anders Fogh Rasmussen taarserpaa, taassuma Natomi pisortassatut ippassaq toqqarneqareerneratigut.
Allattoq Elisa Isaksen
apriilip 05-at 2009 13:20

Lars Løkke Rasmussen dronningimeereerluni anillakkami oqarpoq, suliassani ajukkuteqaluni tigullugu.

- Akisussaaffimmik angisuumik tigusivunga. Ilaat immaqa eqqarsassapput akisussaaffik uannut angivallaartoq. Taakkua oqarfigerusuppakka, Danmarkip aningaasarsiornikkut ajornartorsiornermut qaangiisinnaanissaa anguniarlugu ulloq unnuarlu ulapinniarpunga.

Folketingimi illuatungiliuttut apeqquteqaat tunngavigalugu ministeriunermik piaartumik oqalliseqateqarusupput.

- Nunap ministeriunertaava qanoq isumaqarnersoq innuttaasut ilisimasariaqarpaat. Naalagaaffiup iluani pissutsinik nunanullu allanut tunngasunik apeqqutissaqarpugut aamma naalakkersuinikkut ingerlatsinermi talerperliuniat saamerliuniallu avissaarteqqissaarlugit ingerlatsineq ingerlaannassanersoq paaserusupparput. Ilanngullugu aamma paaserusupparput ineriartortitsinermik aallartitsiniartoqarnersoq, piffissamimi matumani, sapaatip akunneri tamaasa suliffissaaleqisut tuusintinik amerleriartarmata, Socialdemokratit gruppeanni siulittaasoq Carsten Hansen, partit illuatungiliuttut sisamaasut sinnerlugit oqaaseqartitaasoq oqarpoq.