Danmarki naalagaaffeqatiminik tunussivoq
Danmark CITES-imi ataatsimiinnermi nunatta Savalimmiullu isumaat tunullugit EU-p isumaanut illersuiniarpoq. Folketingimi amerlanerussuteqartut ullumi aalajangerpaat avatangiisinut ministerip Japanip tikaagulliit neqaannik tunisassiorniarluni qinnuteqaataanut Danmarki taaseqataassanngitsoq. Folketingimi nunatta ilaasortaatitaa Inuit Ataqatigiinneersoq oqarpoq, pisup takutiinnaraa Danmarkip EU-mut qanoq tunniusimaleriartortiginera, uffa naalagaaffeqatini Kalaallit Nunaat Savalimmiullu arfanniartuusut. Kuupik Kleist oqarpoq:
-Annertusiartortumik folketingimi aammalu uumasunik illersuiniartut isumaat toqqammavigineqartartut malunnarpoq aamma Danmarkip EU-mut pulajartuinnarnerata kinguneranik Danmark nammineerluni isummersorsinnaanera killilerujussuanngornikuuvoq EU-p isumaa malinnerullugu isummersortussanngortitaagami.
Kuupik Kleist aamma isumaqarpoq nunarput IWC-mi piumasarisat malillugit arfanniartuummat naalagaaffeqatigiinnermi arfanniartuusut tusaaniarneqarnerusariaqartut, naak Danmarki 5 millioninik inoqarluni nunatsinni Savalimmiunilu innuttaasunit 110.000-t missaanniittunit amerlanerungaaraluartut.
Kuupik Kleistip nunatta nammineerluni taaseqataasalernissaa pisariaqalernerarpaa:
- Inuit 5 milioniugaluarput, aap, kisianni uagut inuiaqatigiittut ikittunnguugaluarluta aamma Savalimmiormiut ikittunnguugaluarlutik arfanniartuupput malittarisassat naapertorlugit. Taakkualu soqutigisatik soorunami sorsuutigisariaqarpaat, nassuiaavoq.
Namminerlu iliuuseqassanersoq aperigatsinni akivoq:
-Periarfissarput tassaavoq soorunalimi Danmarkimi naalakkersuisut sunnerniaqqinnissaat aammalu nunatta Savalimmiullu soqutigisaat naapertorlugu isummertarnissaata utertinnissaa sulissutigissavarput. Takussavarput qanoq iluatsitsigissanerlugu, Kuupik Kleist taama oqarpoq.
Danmarkimi avatangiisinut ministeri Connie Hedegaard, Konservativineersoq, CITES-p ataatsimiinnerani Japanip piumasaqaataanut naaggaarnissaa pillugu oqaloqatigisinnaasimanngilarput Ritzauimulli oqarpoq, folketingimi amerlanerussuteqartut naalagaaffeqatigiinneq apeqqutaatinngikkaat.
Nunat tamalaat akornanni niuerneq pillugu isumaqatigiissut Bangkok-imi aqagumiit oktobarip ulluisa aappaanniit 14-iat ilanngullugu ataatsimiissutigineqassaaq.
Uumasut nungutaanissamik ulorianartorsiortinneqartut, soorlu arferit aamma nagguaatsut annertuumik oqallisigineqassapput. CITES-imi nunanit tamalaaneersut ataatsimeersuarneranni 166-it peqataassapput, nunatsinnillu Avatangiisinut aamma Piniarnermut aalisarnermullu pisortaqarfiit immikkut ataatsimik aallartitaqassapput.
