Danmarki mingutsitsinerpaanut ilaavoq
Naalakkersuisut saqqummiukkajuppaat svovldioxidimik benzinamullu akugitinneqartartup aqerlup ilanngunneqartartup 1980-ikkunniilli milliartupiloorsimanera, taamakkaluartorli ammoniakimik kvælstofoxidenillu mingutitsitsineq imak angitigaaq allaat EU-mi nunat silaannarmik mingutsitsinerpaat tulleralugu. Mingutsitsinerpaanik tulleriiarineq svenskit saqqummersartuannit Acid News-imit saqqummiunneqarpoq, paasissutissallu EU-mi naatsorsueqqissaartarfimmit EUROSTAT-imi kisitsisaatigineqartunit tunngavilersorneqarluni.
Kvælstofoxidenik mingutsitsineq ingammik pinngortarpoq angallannikkut nukissiorfiillu ikummatissanik ikuallaaneratigut, tassanilu danskit qaffasissumik inissisimapput, Luxembourgimit qaangerneqaanarlutik, tamannalu patsiseqarpoq Danmark erngup nukinganik atomillu nukinganik nukissiorfeqannginneranik.
Ammoniakimik mingutsitsineq puulukunik uumasunillu allanik tunisassiornermit annertoorujussuarmit allaaveqarpoq, tassuuna taamaallaat Irlandimit Danmark qaangerneqarpoq. Akuutissaat pineqartut peqqissusermik ajoqusiisarput, kvælstofoxidet puaat atorsinnaanerat millisittarpaa napparsimalersinnaanermullu akiuussinnaanerat millisarlugu. Danmarkimi issanngusartut bronkitissertartullu hundredetuusinntilikkaat taamaalillutik eqqugaasarput.
Kvælstofdioxidet sialuup seernarsineranik kinguneqartitsisarpoq ammoniakilu Danmarkip naggorissarpallaartarpaa, taamaalillunilu masarsoqarfiit naasupiloqarfinngortittarlugit. Iltimik attaveqaqatigiit oxidet, pasisaapput mingutsitsinerup toqunassusaanik sakkortusaasutut, taamak allappoq politiken.dk.
