Danmarki CO2-mik aniatitsivallaarunnaassaaq

Danmarkimi nukissiorfiit suliffeqarfiillu nukimmik atuiffiunerusut silaannarmik mingutsitamik CO2-mik ukiuni aggersuni aniatitsivallaarunnaassapput.

Silaannaq mingutsitaq sisamararterummik minnerulissasoq, naalakkersuisut pilersaarutaanni ullumi saqqummiunneqartumi takuneqarsinnaavoq.

Taamaattumik suliffeqarfiit annerusumik aniatitsiniarunik akiliisariaqassapput imaluunniit aniatitsinertik millisartariaqassallugu.

Pilersaarutikkut Danmarkip aamma EU-p Kyoto-mi isumaqatigiissummut malinninnissaat qulakkeerniarneqarpoq, mingutsitsinerullu millisarnissaanut Danmark ilungersuuteqarnerpaanut ilaavoq.

Pilersaarusiaq nukissiorfinnut ilungersunarnerpaassaaq aamma nunani allani taamaappoq.

- Taamaattorli nukissiorfinnik ingerlataqartut tamanna akuersaarpaat, Lars Aagaard Dansk Energi-meersoq oqarpoq.

- Kisianni nukissiorfinnut tamanna annernassaqaaq, tassami CO2-mik aniatsitsisinnaanissamut ukiumut 1 milliard koruuninik aamma koruunit milliardit marluk affaasa akornanni amigaateqalersussaassagamik.