Danmarki Canadamit akineqaqquvoq
Aviisimi Berlingske Tidendemi allaaserisaq ilaatigut ima imaqarpoq:
Umiarsuit oqimaatsut tamarmik juulip ulluisa aallaqqaataanniit nalunaarsorneqartalernissaannik Canadami angallannermut oqartussat ilisimatitsereersullu Danmarkimi nunanut allanut ministerip, Lene Espersenip, nassuiaaqquniarpai. Canadami oqartussaasut oqarnerat naapertorlugu, taamatut nalunaarsuisalernerup kingunerissavaa umiarsuit nakkutigilluarneruneqalernerat, aamma isumannaannerusumik angalasoqartalissaaq.
- Tamakku oqallisigisariaqalerput, politikkikkut inatsiseqarnikkullu isumaqatigiinniartariaqarluta nunat allat eqqartueqatigaavut. Apeqqutit issittumut tungasut nunat assigiinngitsut akornanni aaqqiivigisariaqarpavut, Lene Espersen aviisimit Berlingske Tidendemit issuarneqarpoq.
Canada qangali isumaqarpoq Sullualuk Canadap imartaanut atasoq, kisianni USA nunallu allat, aamma Danmark, oqarlutik, Sullualuk nunanit assigiinngitsunit oqartussaaffigineqartoq.
Canadami nunanut allanut ministeri, Lawrence Cannon, Lene Espersenip oqarasuaatikkut sapaatip akunnera kingulleq attavigaa, umiarsuit nalunaarsorneqartalernissaat sukumiisumik pinngikkaluarlugu. Danmarkimili nunanut allanut ministeri isumalluarpoq.
- Canadap Danmarkillu akornanni oqaloqatigiilluaqaagut. Lawrence Cannonip uppernarsarpaa ataatsimoorluta aaqqiissutissanik ujaasigutta
isumaqatigiissuteqarlutalu ajunnginnerpaassasoq, Lene Espersen oqarpoq.
Naalakkersuisut siulittaasuata, Kuupik Kleistip danskit nunanut allanut ministeria isumaqatigaa oqarmat, nunat issittuniittut aammalu Sullualuk nunat tamarmiullutik ataatsimoorussamillu aaqqiissuteqarfigisariaqaraat.
- Apeqqut annertoorujussuuvoq. Tassalu nunat issittut imartaasa oqartussaaffiginissaat uani pineqarmat. Taamaattumik pigaartuuvoq assortuunnermik kinguneqartitsinnginnissaq, paarlattuanik ataatsimoorluni aaqqiisoqartariaqarpoq. Kuupik Kleist oqarpoq.
Qaammatip uuma naalernerani Kuupik Kleist Canadaliassaaq danskit aammalu canadamiut nunanut allanut ministerii oqaloqartigiartorlugit.