USA Pituffimmi maanna radareqarpoq (asseq). Amerikamiullu Kalaallillu Nunaanni siunissami amelanernik radarilioqqissinnaassapput.

Danmark USA-lu: Amerikamiut radarii Kalaallit Nunaanniittut amerlisinnaapput

USA-p Kalaallit Nunaanni radarileeqqinnissani sulissutigaa. Sumilu radariliisoqarsinnaanera immikkut ilisimasallit maanna misissuleruttorpaat.

Amerikamiut Kalaallit Nunaata sineriaani radariliisinnaanissaat Kalaallit Nunaata, Danmarkip USA-llu oqaloqatigiissutigaat. 

Ilaatigut Amerikamiut Københavnimi aallartitaqarfiat KNR-imut taama paasissutissiivoq.

Isumannaallisaanerunissaq Kalaalit Nunaannilu ´suliaqarnerunissaq´ misissorneqartoq nunat pingasut naalakkersuisuisa kissaatigigaat aallartitaqarfiup erseqqissaatigaa.

- Illersornissamut ministereqarfik (USA-mi, aqq.) radariliiffiusinnaasunik misissuinermi ilisimasaminik Danmarkimut Kalaallit Nunaannullu neqerooruteqarpoq, Amerikap Københavnimi aallartitaqarfiani oqaaseqartartoq KNR-imut mailerluni allappoq. 

USA-p Kalaallit Nunaanni NATO-p radariinik inissitsiterinissaq ukkatarigaa internettikkut nutaarsiassaqartitsivik Altinget Arktis apriilip naalernerani allappoq. Allaaserisaq Amerikamiut illersornissamut ministereqarfianni Pentagonimi oqaaseqartartumit kinaassutsiminik isertuussisumit aallaaveqarpoq.

Nutaarsiassaq ilumoornersoq ilumuunnginnersorluunniit uppernarsarniarlugu KNR Københavnimi Illersornissamut ministeriaqarfimmut saaffiginnippoq.

Amerikamiut Københavnimi aallartitaqarfiat KNR-imut akissuteqarluni mailernissaa ulloq ataaseq sioqqullugu illersornissamut ministereqarfik allappoq:

"USA, Danmark Kalaallit Nunaallu amerikamiut Kalaallit Nunaanni suliaqarnera pillugu oqaloqatigiittarput, ilaatigut amerikamiut Kalaallit Nunaanni soorlu radarinik attaveqaasersuinissamut aningaasaliinissaannut anguniagaqaqatigiinnermik 2018-mi nalunaarutaannut tunngasunik." 

Radarit qanoq ittut pineqarnersut qanorpiarlu atorneqassanersut KNR-imut paasissutissiissutigineqanngilaq.

Amerikamiut Kalaallit Nunaanni sakkutooqarfilioqqissinnaasut

USA Pituffimmi maanna sakkutooqarfeqarpoq, Amerikamiullu tassani sakkutooqarnikkut qanoq iliorsinnaatitaanerat killeqanngiusarpoq.  

Sumi radariliisoqarsinnaassanersoq Københavnimi illersornissamut ministeriaqarfiup maannakkuugallartoq  paasissutissiissutigerusunngilaa.  

USA-p Pituffimmi atortunik nutarterinissamut milliardinik aningaasaliinissani kissaatigigaa Berlingske allaaserisaqaqqammerpoq. Aningaasaliinialersaarnerli Naalakkersuisunut Folketingimulluunniit ilisimatitsissutigineqarsimanngitsoq aviisi allappoq.  

AAMMA ATUARUK USA vil investere milliarder i Pituffik

Radariliisoqaqqinnissaali pillugu USA-p, Danmarkip Kalaallit Nunaatalu suleqatigiissuteqarnermik nalunaaruteqarnerat illersornissamut ministerip Morten Bødskovip (S) maajip qulingani apersorneqarnermini akissutaanit allaaneruvoq. Issittumi piginnaasanik annertusaaneq pillugu Københavnimi taamani isumaqatigiissuteqarnermi.

Ministeri KNR-imit ima aperineqarpoq:

- Amerikarmiut Kalallit Nunaanni radarimik imaluunniit radarilersuerusullutik kissaateqarnerat Altinget Arktisip allaasereqqammerpaa. Tamanna pissava? Aamma issittumi piginnaasanik annertusaanermi USA peqataasinnaanerluni suleqataasinnaanerlunilu?

Illersornissamut ministeri Morten Bødskov (S) ima akivoq:

- Allaaserisaq atuarpara. Tamannali uagut peqataaffiginngilarput. 

USA-p Kalaallit Nunaanni attaveqaasersuutinut taamatullu sakkutooqarnermut sakkutuujunngitsunullu aningaasaleerusunnini 2018-mi nalunaarutigaa. 

Nuummi Ilulissanilu mittarfissualiortoqarnissaanut USA-p aningaasaleerusussasoq taamani ilimagineqarpoq, mittarfiliornissarli danskit naalagaaffiata aningaasaliiffigivaa.

USA-li mittarfinnut sakkutooqarfiunngitsunut aningaasaliinngilaq. Attaveqasersuuserinerli alla maanna ukkanneqalerpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl