Danmark: Uranimik piiaanissaq akueraarput
Taamaattorli Danmarkip uraanimut atatillugu nutaamik isummernera ujarassiuup nunani tamalaani ilisimaneqartup Nunatsinnilu pissutsinik ilisimasaqarluartup, Minik Rosingip, Københavnip Universitetianeersup tupigusuutigaa.
- Taama nalunaaruteqartoqarnera tupaallannartuuvoq, uraanimummi tunngatillugu kikkut oqaasissaqartuunersut maannamut erseqqissumik nassuiarneqanngimmat, Minik Rosing aviisimut Berlingske Tidendemut ullumi taama oqarpoq.
- Ministeriunerulli isaanik isigalugu tamanna maanna nalornissutaanngilaq, Minik Rosing oqarpoq.
Aatsitassarsiortitseqatigiit uraanitalinnik piiaasinnaalertinnagit, Inatsisartut aalajangeeqqaartussaapput. Tamatumalu kingorna nunanit tamalaanit akuersissutit, suliassap ingerlanneqartarnissaa, aamma sananeqaatinik qinngulasunik akulinnik piiaanermi isumannaallisaanerit qulakkeerneqartussaapput.