Danmark timmisartunik malersuutinik F-16-inik Ukrainemut tunissuteqarniartoq
Danmarkip timmisartut malersuutit F-16-it 19-it Ukrainemut tunissutiginiarpai.
Ministeriuneq Mette Frederiksen, Ukrainep præsidentia Volodymyr Zelenskyj peqatigalugu tusagassiortunik Skrydstrupip mittarfiani katersortitsinermi taama oqarpoq:
- Kiffaanngissuseqarnersi uagutsinnut aamma kiffaanngissuseqarnerusoq nalunngilarput. Aamma ilisimavarput suli pisariaqartitsisusi, Mette Frederiksen ilaatigut oqarpoq.
- Taamaammanuna nalunaarutigigipput F-16-inik tunissuteqarniartugut, taanna oqarpoq.
F-16-it siulliit arfinillit ukiortaap nalaani nassiunneqarumaartut oqaatigineqarpoq. Arfineq-pingasut tullii 2024-mi taava nassiunneqarumaarput, kingulliillu tallimat 2025-mi tunniunneqassallutik.
Danmarkip timmisartunik malersuutinut nutaanut F-35-nut ikaarsaarnera ilutigalugu F-16-it Ukrainemut tunissutigineqarniarput. Illersornissamut ministereqarfik tusagassiorfinnut taama nalunaaruteqarpoq.
Ukrainemiut sakkutuui ilinniartinneqaasapput
Ukrainep illersorneqarnissaa pingaarnerutillugu F-16-it tunissutigineqarniartut Mette Frederiksenip oqaatigaa. F-16-it assersuutigalugu Ruslandimi aalajangersimasunik eqquisannginnissaat Danmarkimi naalakkersuisut piumasarisimaneraat aperineqarami ministeriuneq taama akivoq.
Danmark Hollandilu timmisartunik malersuutinik Ukrainemut tunissuteqarniarnerat ullumi nalunaarutigineqareersorlu Mette Frederiksen taama oqarpoq.
Ukrainemiut sakkutuui timmisartortartut F-16-inik timmisartorsinnaalerpata aatsaat tunissutigineqassapput, sakkutuullu Danmarkimi ilaatigut ilinniartinneqassallutik.
Ukrainemiut sakkutuuia 70-it sinnerlugit maanna Danmarkimiittut, ilinniartinneqarnissamillu piareersimasut Mette Frederiksenip oqaluttuaraa.
Volodymyr Zelenskyj-p Danmarkimut tikeraarnera tulluusimaarutissaasoq, Mette Frederiksenip tusagassiortunik katersortitsinermi Danmarkimi innuttaasut sinnerlugit ilaatigut oqaatigaa.
Præsidenti qujamasuttoq
Volodymyr Zelenskyj oqalugiarnermini Mette Frederiksenimut qujassuteqarpoq.
- Qujamasuppunga. Qutsavigaassi. F-16-it 19-it uagutsinnut tapersersuineruvoq sakkortooq, taanna oqarpoq.
Danmarkip Ukrainep illersornissaqarfianut assigiinngitsutigut aamma tapersersuinera taassuma aamma qujamasuutigaa, imassanik, qamutinik sorsuutinik sakkussanillu allanik tunissuteqartoqarnikuunera qujamasuutigalugu.
Illoqarfiup Mikolajivip sanaqqinneqarnissaanut Danmarkip ikiuunniarnera Zelenskyj-p aamma qujamasuutigaa.
Zelenskyj Folketingimut dronning Margrethemullu ataasinngornermi pulaarnermini takinerusumik aamma oqalugiarniarpoq.