Danmark tapersersuivoq
Kalaallit Nunaata Savalimmiullu EU-mik suleqateqarnerulernissaat Danmarkimit tapersersorneqarpoq. Danmarkimi naalakkersuisut nunatta namminerisaminik aningaasaqalernissaa aamma tapersersorpaa – Savalimmiormiut mittarfik Vágar namminneq akisussaaffigilissavaat. naalagaaffeqatigiinnerup iluani nunani pingasuni naalakkersuisut ukioq manna ataatsimeeqatigiinneranni tamakku pingaarnertut Anders Fogh Rasmussenimit saqqummiunneqarput.
Atlantikup avannaani suleqatigiissitami ilaasortat EU-mi nunanik suleqateqarnerisa pitsanngorsaaffigineqarnissaat Danmarkimi naalakkersuisut tapersersoraat ministeriunerup Anders Fogh Rasmusenip erseqqissarpaa. Tamannalu aqqutissiuunniarlugu kalaallit EU-milu ilaasortat qanittukkut suleqatigiissummik atsioqatigeeqqammerput Savalimmiormiullu EFTA-mi ilaasortanngornissamik kissaateqarput. Taama kissaateqarneq danskit naalakkersuisuinit tapersersorneqarpoq.
Nunatta namminerisaminik aningaasaqalernissaa aamma tapersersorneqarpoq. Tamanna pingaarnerit aappaattut ataatsimiinnermi eqqartorneqarsimasoq ministeriunerup nalunaarutigaa, oqarluni, nammineq nunagisami immikkut ilisarnaatit aningaasani assiliartalersorneqarnerat pingaaruteqarluinnartoq. Nuannaarutigaa Danmarkimi aningaasaqarnermut ataatsimiititaliami ilaasortat aalajangersimammassuk, danskit aningaasaanik taasinermi immikkut akiliisoqartassanngitsoq.
Ministeriunerup pingaarnersiuinermini pingaarnerit pingajuattut savalimmiormiut mittarfimmik Vagarimik akisussaarusullutik kissaateqarsimanerat eqqaavaa. Taama kissaateqarneq kiisami ataatsimiinnermi aalajangiiffigineqarpoq. Mittarfik 365 million koruunit nalinginut aaqqissuunneqaqqereerpat savalimmiormiunut tunniunneqassaaq.
Mittarfiup tunniunneqarnissaanik aalajangerneq Joannes Eidesgaardip nuannaarutigaa. Savalimmiormiut kalaallillu naalakkersuisa siulittaasuisa ataatsimiinnermi angusatik nuannaarutigaat.
