Pele Broberg: Danmark sunniiniarpalaartumik politikkerpoq

Naak Aki-Matilda Høegh-Dam (N) saamerliit naalakkersuisuutitaqarnissaannut, Siumukkunnut ilaasortaagallarami, marloriarluni tunngaviliinikuugaluartoq, Naleqqap qineqqusaarnermi matumani taamaaliornissani neriorsuutigerusunngilaa.

Partiip siulittaasua Pele Broberg aappalaartuunatik tungujortuunatillu oqarpoq; partiilli qalipaataa assigalugu sungaartoq aappaluaartuullutik.

Siumut Demokraatillu ministeriuninngorniartuni sorleq tapersersussanerlugu maannangaaq oqaatigisinnaanagu oqarput.

Naleqqap siulittaasua KNR-imit, Inatsisartuni partiip allaffiani Folketingimut qinigassanngortittut saqqummiunneqaqqammersut, ataasinngornermi apersorneqarpoq.

Partii ilaasortaatitaqaannassappat, Naleqqap Danmarkimi naalakkersuisunngortitsinissamut tapersersuinissaannut suut pisariaqarnersut, Pele Broberg aperineqarpoq

- Kalaallit Nunaanni politikkimut, ukiorpassuarni kingullerni taamaaliortarnerattut, akuliutinnginnissaat nammineerlutalu aalajangiisinnaatitaanerput ataqqissagaat. Tamanna isertitaqassagutta aalajangiisuussaaq, Pele Broberg oqarpoq. 

Politikkikkut sunniiniarnerit unitsinneqassasut

Pele Brobergip Danmarkimut attaveqarneq eqqarsaatigigaangamiuk, nunatta nassueruteqartitsiniarnermini qanoq tamaviaartariaqartigisarnera maluginiarpaa; ministeriuneq talerperliugaangat saamerliugaangalluunniit.  

Namminersorlutik Oqartussat pillugit inatsit, talerperliit naalakkersuisuuneranni atuutsilersinneqartoq, matumani assersuusiaraa. Spiralilersuinermut tunngatillugu utoqqatserneq, Mette Frederiksenip socialdemokratineersup saamerlernit ministeriutinneqartoq kingullertut eqqaavaa.

- Saamerlernit naalakkersuisuutitaasut, imaluunniit qiterlernit, suliniutit kingulliit isumagivaat. Suliniutilli tamaviaarutigeqqaarpagut, Pele Broberg oqarpoq.

Aki-Matilda Høegh-Dam saamerliit naalakkersuisuutitaqarnissaannut marloriarluni, Siumukkunni ilaasortaagallarami, tunngavileeqataavoq. Naleqqalli qineqqusaarnermi matumani kina ministeriunertut tikkuunniarnerlugu qinersinissaq sioqqullugu neriorsuutigerusunngilaa. Assi © : KNR / Markus Valentin

Partiip siulittaasuata, talerperliit akornanni Kalaallit Nunaata Danmarkimut qaninnerulernissaanik namminerlu aalajangiisinnaatitaaneranik ungasillisitsiniartunik anguniagaqartoqarsoraa.

Saamerliilli akornanni, maanna ministeriunerup Mette Frederiksenip ilaaffigisaani maanna taamaaliortoqarnera takusinnaavaa.

- Danmarkip naalakkersuisutsinnut politikkikkut sunniuteqangaarnera aqutsiniarnerallu takuarput.

- Taamaattumik aappaluttunik aamma tikkuussiinnarnavianngilagut.

"Qinersinivissap tungaanut qinersigallarneq" 

Pele Brobergip danskit politikerii illuatungiliuttut kisiisa isornartorsiunngilai. Aammali partiit naalakkersuisooqatigiit isorivai.

Folketingimut qinersinermi matumani politikkikkut oqallinneq siornatigornit pingaaruteqarnerusoq, Pele Broberg oqaluttuarpoq.

Tamanna naalakkersuisooqatigiit pilersinneqarmatali qinersisoqaqqaartoqalerneranik pissuteqarnerarpaa, qinersisartullu naalakkersuisut politikkiat pillugu isummersinnaanerannik.

- Neriorsuutinik inatsisartunut qinersinerup kingorna qanoq unioqqutitsisoqaqattaartiginera maanna takoreerparput, Pele Broberg oqarpoq.

- Taamaattumik partiit allat sisamaasut qineqqusaarnerminni neriorsuutiminnik unioqqutitsinerat innuttaasunit akueriinnarneqassanersoq pissanngatigaarput. 

Naleraq maannamut sisamanik qinigassanngortitsivoq. Partiillu anguniagai tallimanngorpat aatsaat saqqummiunneqassaaq; ulloq qineqqusaartunik innersuussinissamut killigititaasoq assigalugu.

Allanik qinigassanngortitaqarpisi kingusinnerusukkut tamanut saqqummiunneqarumaartunik?

- Tamanna kingusinnerusukkut paasiumaarparsi, Pele Broberg oqarpoq.

- Qinigassanngortitaasut piukkunnarluinnartut sisamat, tamarmik immikkut nukittuffillit, maanna ilisariteqqammerpagut. Tamanna ullumikkut ataatsimoortitsinitsinnut pissutaavoq.