Danmark Ruslandilu inussiarnisaarfiginerulerput

Taakkua marluullutik isumaqatigiissutigaat nunat taakkua marluk naalakkersuisuisa akornanni pissutsit ukiut siuliini isumaqatigiinngittarnerit pasilleqattaannerillu kingorna kingumut nalinginnaasunngorsimasut, aammalu siumut isiginissamut kiisalu politikkikkut inuussutissarsiornikkullu ataatsimoorluni pitsaanerpaamillu sulinissamut piffissanngortoq.

Taakkua marluullutik Medvedevip pisortatigoortumik Danmarkimut tikeraarnera "oqaluttuarisaanermi pisimasutut" siunissamilu suleqatigiinnissamut pitsaasumik aallarniutissatut taavaat.

Oqaloqatigiinnerit inerneri tassaalerput nunat marluk taakkua naalakkersuisuisa akornanni suleqatigiinnissamik isumaqatigiissutit sisamaasut, qullersat marluullutik ministeritik peqatigalugit atsiugaat, Christiansborgimi Dronningip atuakkanik atorniartarfiutaani naasut, qernertulisaarlutik assuartut, atuakkat tv-kkullu assiliissutit akornanni.

Kiisalu nukissiuuteqarneq silalu pillugit isumaqatigiissutit marluk isumaqatigiissutigineqarput. Danmarkip Ruslandi nukissiuutinik aammalu nukissiuutinik ataavartunik pitsaanerusumik atuinissaanut ikiussavaa. Suliassaqarfiit taakkupput Danmarkip sivisuumik misilittagaqarfigisai, Ruslandimili manna tikillugu sammineqarpianngitsut maannakkulli russit naalakkersuisuinit salliutinneqalersut.

Ruslandimi inuit pisinnaatitaaffiisa ajornartorsiutaanerat, Kaukasusimi allanngoriartorneq Ruslandimilu naalakkersuinermi illuatungiliuttuni uumisaarunneq siornatigut tassaasimapput naalakkersuisut taakkua marluusut akornanni mamianaqutaasut, maannakkulli unitsinneqartut.

- Oqaluuserisassat qaqippakka, oqaluuseraavullu suleqatigiit akunnerminni pisarnerattulli, Danmarkip ministeriunera oqarpoq.

Medvedev erseqqissaavoq, oqaluuserisassat suleqatigiinnit isumaqatigiissutaanngitsut isumagissaarnermik aseruissanngitsut.

- Tamanna pissusissamisoorluinnarpoq. Oqaloqatigiinneq pingaaruteqarpoq. Erseqqissassavarali, ajornartorsiutigisavut uatsinnit taamaallaat aaqqinneqassammata. Kikkulluunniit pinerluttuliortut pillarneqassapput, Ruslandip præsidentia oqarpoq.