Naalagaaffik Nunavummi sinniisoqarfeqalissaaq. Sinnissoqarfissaq ukiaru atulersinneqassalluni. Nunavummi Danmarkip sinniisoqarfeqalernissaa pingaaruteqartoq Danmarkip Canadami aallartitaa Poul Kristensen oqarpoq.
Canadap immikkoortoqartaqarfiini tamani sinniisoqarfeqaratta pingaartipparput Nunavummi aamma sinniisoqarnissarput, Kalaallit Nunataa Nunavullu suleqatigiinnerminni periarfissaat tassuuna aamma ilisarnaateqarniassammata, Poul Kristensen oqarpoq.
Danmarkip Nunavummi ukiap ingerlanerani sinniisoqarfimmik ammaanissaa qeqertap Tartupaluup nunatsinnut imaluunniit Canadamut atasuunerata piffissami kingullermi oqillissutigineqarneranut attuumassuteqanngitsoq Poul Kristensen erseqqissaavoq.
Nunatta Canadallu nunatut killeqarfia immap naqqani nunap toqqavianiittoq Danskit Canadamiullu suleqatigiillutik misissorniarpaat, tamannalu pillugu Tartupaluup sumut atanera saqitsaassutigineqartariaqanngikkaluartoq Poul Kristensen isumaqarnerarpoq, oqarpoq naalagaaffiup Canadamiullu akaareqatigiillutik suleqatigiillutillu tamanna inissinniartariaqaraat. Naalagaaffiup Nunavummi sinniisoqarfissaa nunatta Nunavullu politikikkut allatigullu suleqatigiinnerannut attuumassuteqanngitsoq, Namminersornerullutik Oqartussat nunanut allanut allaffeqarfiata pisortaa Inuuteq Holm Olsen oqarpoq.
- Inuilli soorlu pas-iminnik tammaaasimagunik nutaamilluunniit pas-itaassagunik sinniisumut ikioqqusinnaapput. Aamma danskit naalagaaffianni innuttaasut Nunavummi angalasut sinniisumut arlaatigut atorfissaqartikkunikku ikoqqusinnaassasut Inuuteq Holm Olsen oqarpoq.
Naalagaaffiup Nunavummi sinniisussaa ukiaru inuttalerneqassaaq, sinniisussarlu atorfimmi saniatigut sinniisutut atuutissasoq Inuuteq Holm Olsen oqarpoq.
