Danmark nunarput avaqqullugu iliuuseqarpoq

Arfanniartarneq Pillugu Nunat Tamalaat Kommissionianni IWC-mi ataatsimeersuarnermi Danmarkip Kalaallit Nunaatalu akornanni oqaaseqaatissat taasisarnissallu isumaqatigiissutaareersut, Kalaallit Nunaat avaqqullugu Danmarkimit allanngortinneqarsimapput.

Japanip ilisimatusaatigalugu arfanniartarnissaminut siunnersuutaa, IWC-mit assuarineqarluinnarnissaa Australiamit siunnersuutigineqarmat, nunat amerlanerussuteqartut Australiap siunnersuutaat akueraat. Danmark Australiamut illersuilluni, Japanimut assuarinninnissamut akuersivoq.

Aalisarnermut piniarnermullu pisortaqarfimmi pisortaq Amalie Jessen, oqarpoq, Danmarkip Kalaallit Nunaatalu akornanni Maj-ip 18-ani ukioq manna, IWC-mi iliuusissatut isumaqatigiissutaareersimasut, Danmarkip Australilamut angerneratigut, iliuusissatut isumaqatigiissutit unioqqutinneqarsimasut.

Australia arfanniartarnermut akerliulluinnartuni, IWC-mi siuttuuvoq, amerlanertigullu arfanniartarnerit unitsivinneqarnissaat Australiap kissaatigisarlugu.

- Sapaatip akunnerani kingullermi nunanut allanut ministerip Per Stig Møller-ip isumaqatigiissut Kalaallit Nunaat tusarniaavigeqqaarnagu allanngortissimavaa. Australiap siunnersuutaa taaseqataaffigineqartussaanngikkaluartoq, taasisitsinermi Danmarkip ullumikkut Australiap siunnersuutaa angerpaa. Danmarkip taamatut pissusilersortalernera naammaginanngilaq, Amalie Jessen naggasiivoq.