Danmark sorsunnersuup kingulliup kingorna siullermeerluni nunanut allanut akiitsueruppoq. Naalagaaffiup aningaaserivissuata naatsorsuusiaani tamanna takuneqarsinnaavoq.
2005- naanerani danskit nunani allani pigisaat 3.021 milliard koruuniupput uninngasuutaallu 2.985 milliard koruuniullutik – tassa imaappoq ilanngaatissat ilanngaatigereerlugit 36 milliard koruunit danskinit aningaasaatigineqarput.
Nunanut allanut akiitsut 80-kkut naaneranniili ikiliartorput, malunnarnerusumilli ukiuni pingasuni kingullerni ikiliartupiloorsimapput.
Dansk Bankimi aningaasarsiornermik immikkut misissueqqissaartartut pisortaat Steen Bocian oqarpoq ukiuni kingullerni 20-ni naalakkersuinermik suliaqartut aningaasat sumut atorneqarnissaanik pilersaarusiortarnerisa kingunerisaanik nunanut allanut akiitsut aalajangersimasumik nungunnissami tungaannut akilersorneqarsinnaalersimapput. 1982-imi naalakkersuinermik suliaqartut aalajangersimasumik akilersuinissamik malittarissassiornerisa kingorna danskit aningaasaataat tyskit aningaasaanut Euromullu tulluussarneqarsinnaalerput.