Peqqarniisaartartunut al-Qaedanut, ilaasortat nuimasut ilaata video-mut, internetikkut ippassaq atuarneqarsinnaalerlunilu tusarnaarneqarsinnaalersumut, immiussaani muslimit kajumissaarneqarput, Danmark, Norge Frankrigilu saassuteqqullugit.
- Pruffiitimik Muuamaamik titartakkat saqqummiunneqarnissaat nunat taakku pingasut akuersaarsimammassuk suujunnaarsinneqartariaqarput, libyamiu, Mohammed Hassan, isumaqarpoq.
- Muslimimik upperisaqartuususi, pruffiitersi akiniussiuk. Naalagaaffeerakasik Danmark, Norge Frankrigilu sakkortuumik eqqorneqartariaqarput suujunnaarsillugillu, Mohammed Hassan videoliami oqarpoq.
Videoliaq minutsinik 35-nik sivisussusilik qangarpiaq immiussaasimanersoq nalunarpoq, paasinarporli tusassiorfinnik suliniaqatigiiffiup, al-Sahabip, videonik peqqarniisaarnissamik imalimmik al-Qaedakkunnut siusinnerusukkut suliaqartareersimasup, immiussarigaa.
Islamimik upperisallit oqaaseqartartuat, Kasem Ahmed, qanittukkut oqarpoq, musliminik peqqarniisaarusulluinnartunik Danmarkimi nassaarsiornissaq ajornakusoornavianngitsoq, peqqarniisaarnissamillu video-kkut kajumissaarineq una kingulleq taama oqarnerup kinguninngua tassa maanna tutsiuppoq.
Kasem Ahmed aviisimut Ekstra Bladet-mut oqarpoq, nammineq inuttut taama oqaaseqaannarsimalluni.