Danmark: Meeqqat 12-it inorlugit ukiullit siulliit coronamut akiuussutissamik kapitittut

Danmark-imi meeqqat 12-it inorlugit ukiullit siulliit coronamut akiuussutissamik kapineqarput.

Regionit tallimat sapaatiummat ullup qeqqanut taamatut Ritzau-imut nalunaarput.

Taamaalillutik akiuussutissinneqartussat nutaat – meeqqat 5-iniit 11-t tikillugit ukiullit – akiuussutissamik kapoorneqaleruttorput.

Region Hovedstaden-imi meeraq siulleq sapaatiummat nalunaaqutaq 09.20 Amager Vaccinationscenter-imi kapitippoq.

Regionimi tassani nakorsanit nakkutigineqartunik arfineq marlunnik immikkut meeqqanut akiuussuserneqartussanut aaqqissuunneqartuni meeqqat nukarliit akiuussuserneqartalerput.

Meeqqat tamakkua akiuussuserneqarnissaannut piffissaq sivitsorneqarpoq kiisalu soorlu timersortartut nipilersortartullu tusaamasat assingi plakatinngorlugit nivinngarneqarnikuullutik.

Tamatumuuna kapitiffissat nuannerlutillu eqqissisimanartuunissaat anguniarneqartoq pisortaq oqarpoq.

Meeqqat tamakkua akornanni angajulliit sapaatiummat kapitiortorput, sapaatillu akunnerata tulliani meeqqat 7-niit 9-nut ukiullit kapitiortoreerpata, decembarip 6-ianniit tallimaniit arfinilinnut ukiullit kapitiortussapput.

Meeqqat 5-iniit 11-nut ukiullit 431.256-iupput.

Meeqqat kapitikkiartornerminni angajoqqaaq minnerpaamik ataaseq ilagisassavaat.

Sundhedsstyrelsen tallimanngormat nalunaarpoq, meeqqat 5-iniit 11-t tikillugit ukiullit akiuussutissinneqartalernissaat innersuussutigalugu. Siornatigut Danmark-imi taamaallaat 12-it qaangerlugit ukiullit cornamut akiuussutissamik kapineqarsinnaanikuugaluarput.