Danmark Libanonimi umiarsualiinissaminut piareerpoq

Allattoq Mads Lynge
septembarip 08-at 2006 10:41

Libanonip sineriaani umiarsuarnik sorsuutinik Danmark umiarsualiinissaminut piareerpoq – folketingimi siunnersuut siullermeerluni oqallisigineqarmat partiit tapersersuipput.

Danskilli umiarsui atorneqassanersut suli qulakkeerneqanngilaq.

Libanonip sineriaani umiarsualiinissamik siunnersuut folketingimi ullumi akuerineqarpoq. Taamaalillutik umiarsuit sorsuutit pingasut Korsørimi naatitanik usilerneqareerunik Libanonip sineriaanut nakkutilliiartorlutik aallarnissaminnut kalerrinneqarnissartik kisiat maanna utaqqilerpaat. Naalagaaffiit Peqatigiinni Danmarkip ilaasortaanini pissutigalugu tapersiilluni umiarsualeerusukkaluaqisoq tyskit Libanonip sineriaani umiarsualiussassanik toqqaasussaatitaammata umiarsuit nakkutilliiartussanersut nalunarallarpoq:

- Umiarsuit sorsuutit pingasut Danmarkimit neqeroorutigaagut. Tyskit akuersisussaatitaasut maanna apeqqutaalerput, nunanut allanut ministeri Per Stig Møller oqarpoq nangillunilu:

- Franskit, italiamiut, grækerit tuluillu umiarsualiisussatut tyskinit toqqarneqarsimapput. Taakku Libanonip sineriaani nakkutiginninnerminni, hizbollah-kkut nunanit allanit sakkussaminnik anngiortumik eqqussuineri killilersimaarniarsarissavaat. Hizbollah-kkut eqqussuinerat taqqavani naalakkersuisut nakkutigisinnaannginnamikku ikioqqupput.