Hans Enoksen isornartorsiorneqarnertik pillugu: Danmark kisimi periarfissaanngilaq
Inuit Ataqatigiit siulittaasuata Sara Olsvigip Jyllands-Postenimi allaatigisamini Partii Naleraq isornartorsiorpaa aningaasaqarnermut tunngatillugu akisussaassuseqannginnerarlugu. Partii Naleqqalli siulittaasuata Hans Enoksen, taamatut isornartorsiorneqarnertik, tupinnanngitsumik, isumaqatiginngilaa.
Partiip qineqqusaarnermini arlaleriarlugu oqaatigisarpaa aningaasat nunatsinnit annissorneqartut annertuallaartut, tamatumalu allanngortinneqarnissaanut maanna piffissanngortoq.
AAMMA ATUARUK Partii Naleqqap aningaasaqarnermik paasinnittaasia akisussaassuseqanngilaq
Danmark kisimi periarfissaanngilaq
Nunatta naalagaaffinngornissaanut naalagaaffimmit ataatsimoortumik tapiissutaasartut taartissaannut aningaasatigut periarfissat arlaqarnerarpai, pisuussutillu nunatsinnut annerusumik iluaqutaanngitsumik annissorneqarnerat tikkuarlugu.
- Aamma isumaqartoqassanngilaq Danmark kisimi periarfissaasoq. Nunat allat, naalagaaffippassuit, periarfissaqarput aamma ikiuunnissaminnut niueqatigiinnissamut. Assersuutigiinnarlugu piffissami kingullermi misigivarput Islandimiut, Savalimmiut kalaallillu atsioqatigiimmata niueqatigiinnerulernissaminnut, taava qallunaat naalagaaffiata tamanna ingerlaannartumik atorunnaarsippaa. Sooruna taamaaliortut? Takusinnaagamikku nammineernerulernissatsinnut periarfissat nammineerluta ammariartulerigut, Hans Enoksen taama oqarpoq.
Nunalli taakku niueqatigiinnerunissamik isumaqatigiissutigisaata atorunnaarsinneqartup naalagaaffiup ataatsimoortumik tapiissutigisartagaanut qanoq annertutiginersumik matussutaasinnaanersut Hans Enoksenip itinerusumik oqaaseqarfiginngilaa.