Danmark Kalaallit Nunaanni akisussaaffeqarneranik Kina ataqqinninnerminik ersersitsivoq

Kalaallit Nunaat eqqarsaatigalugu Danmarkip akisussaaffeqarnera nunallu killeqarfiisa innarligassaannginnera Kinap “tamakkiisumik” ataqqivaa.

Tusagassiorfik Reuters naapertorlugu Beijingimi danskit nunanut allanut ministerianik Lars Løkke Rasmussenimik (M) ataatsimeeqateqarnermi Kinap nunanut allanut ministeria Wang Yi ataasinngormat taama oqarpoq.

Qaammatini arlalinni USA-p præsidentiata Donald Trumpip Kalaallit Nunaannik Danmarkimillu tatisereernerani Kina taama nalunaaruteqarpoq, taannami Kalaallit Nunaannik tiguaajumalluni sakkutuulersorluni pissaanermik atuinissamik itigartitsinngilaq.

Kinap Kalaallit Nunaat pillugu Danmark tapersersorpaa, Wang Yilli aamma Danmark allatut kissaateqarfigaa.

Kinap kisimi oqartussaaneranut nunallu killeqarfiisa innarligassaannginneranut tunngasunut Kinap isiginnittaasianik Danmark tapersersuiuarumaarneranik Kina neriuuteqarpoq. 

Pisortatigoortuunngitsumik tikeraarneq

Ullualuinnaat matuma siorna Taiwanimi præsidentiusimasoq Tsai Ing-wen pisortatigoortuunngitsumik Danmarkimut tikeraarpoq.

Reuters naapertorlugu tikeraarneq Taiwanip Kinamut ilaaneranik tunngaviusumik najoqqutassiamik itigartitsinertut isigineqartoq, Københavnimi Kinamiut aallartitaqarfiat oqarpoq.

– Taiwan pillugu apeqqut Kinamiinnaq aalajangiiffigineqarsinnaavoq, nunanilu allani naalakkersuisunit, kattuffinnit inuinnarnilluunniit akuliuffigineqassanngilaq, Reutersimut allakkatigut akissummi allassimavoq.

Danmarkip Kina naalagaaffittut ataatsitut kisimi akueralugu politikkeqarpoq, taamaalillunilu Taiwan naalagaaffittut namminersortutut akuerinngilaa. Tamanna pissutigalugu Danmarkip aamma Taiwan pisortatigoortumik attaveqarfiginngilaa.

Kinap Taiwan, nunaminut ilaasutut isigisani, sivisuumik sakkutooqarnikkut tatisimavaa. 

/ritzau/