Danmark Issittumi Siunnersuisooqatigiinni sulisussamik aallartitsilersoq

Danskit nunanut allanut ministeriaqarfiata allattoqarfimmut Tromsømiittumut sulisumik aallartitsinissaq pillugu Issittumi Siunnersuisooqatigiit isumaqatigiissuteqarfigisimavai.

Sulisoq pineqartoq Issittumi Siunnersuisooqatigiit allattoqarfiata ulluinnarni sulinerani ukiormanna suleqataassaaq.

Sara Olsvigip (IA) sulisup taassuma Naalagaaffeqatigiit tamakkerlugit suliaqarnissaa, taamaattumillu Kalaallit Nunaata Danmarkillu peqatigiillutik toqqarneqartariaqarnera erseqqissaatigisimagaluarpaa. Nunanulli allanut ministerinngortup Martin Lidegaardip akissuteqaateqarluni tamanna itigartissimavaa.

- Sulisorneqartussaq taanna danskit naalakkersuisuisa imaluunniit naalagaaffeqatigiit Issittumi Siunnersuisooqatigiinni sinniisuattut imaluunniit immikkut ittumik pisinnaatitaasutut suliaqassanngilaq, erseqqissaavoq.

Ministerittaaq ilanngullugu oqaatigaa atorfik naalagaaffeqatigiit immikkoortuini pingasuusuni inuttassarsiuunneqarumaartoq.

Issittumi Siunnersuisooqatigiit Tromsømi allattoqarfiat juunimi 2013-imi pilersinneqarpoq arfineq-marlunnillu sulisoqarluni.