Danmark iluanaartussanngorpoq

Danskit naalagaaffiat USA-lu immikkut ittumik isumaqatigiissuteqarput, USA-ip missilinut illersuusiornissamini danskit suliffeqarfiutaannik suleqateqarnissaanik imaqartumik.

Danskit illersuusiornermut suleqataassapput suleqataanertillu aningaasarpassuarnik pissarsiaqarfiusussaavaat, nunarpulli suleqatiserineqanngilaq immikkut illersuusiornermut ilisimasalinnik soqannginnami.

Amerikamiut Pituffimmi sakkutooqarfiat nunatsinniippoq, taamaattorli tassa danskit suliffeqarfiutaasa kisimik aningaasatigut iluanaarutigisussanngoraat nunarput sinnerlugu Folketingimi ilaasortaap aappaa Inuit Ataqatigiinneersoq Kuupik Kleist Danmarkimi aviisimut Informationemut oqarpoq.

Kuupik Kleist-ip ernummatiginerarpaa tamanna nunatsinnut kipiluttunartumik inissitsitsilersoq, tassa oqaluttuaq uteqattaartoq aamma taamaalilluni uteqqinneqalersoq, tassa danskit nunarput iluaqutigalugu amerikamiunik suleqateqarnermikkut iluanaalersut, tamatumalu kingunerisaanik nunarput ajornartorsiutigiligassaminik aasit qimatsivigineqarumaartoq.

Nunarput USA Danmarkilu siorna isumaqatigiissuteqarput amerikamiut Pituffimmi radareqarfimminnik nutarterinissaannik qulakkeerinnittumik.