Danmark illersornissamut tunngasuni EU-mi oqartussaaqataalissappat, EU-p Issittumi sillimaniarnikkut sulineranut sunniuteqaqataalersinnaavoq.Assi: KNR / Anton Gundersen Lihn

Danmark illersornissamut tunngasuni EU-mi oqartussaaqataalissappat Issittoq sammineqarnerulersinnaasoq

Danmark illersornissamut tunngasuni EU-mi oqartussaaqataalissappat EU-p Issittumi sillimaniarnermik sammisaqarnerulerneranik kinguneqarsinnaasoq, sakkutooqarnermik immikkut ilisimasalik naliliivoq.

Danmark illersornissamut tunngasuni EU-mi suleqataalissanersoq ullumi pingasunngornermi taasissutigineqarpoq.

EU Europami illersornissamut suleqatigiinneq pillugu oqallikkaangat iliuuseqaraangallu, Danmark 1993-imili tusarnaaginnarsinnaavoq, aalajangeeqataasinnaananilu.

Danskilli naalakkersuisuisa tamanna allanngortikkusuppaat.

Tamannalu allanngussappat, Danmarkilu EU-p Issittumi sillimaniarneq pillugu oqaluuserisaqartarnerinut ilaasalissappat, naalagaaffeqatigiinnut tamanut iluaqutaasinnaavoq. Illersornissamut Københavnimi ilisimatusarfiup Issittumi sillimanianermut immikkoortortaqarfiani pisortaq, Henrik Gram Pedersen KNR-imut taama oqarpoq.

- Danmark tusarnaaginnartussaanani sunniuteqarsinnaasumik oqaaseqarsinnaaleruni Issittumi pissutsinik oqallittoqaraangat sunniuteqarsinnaalissammat, iluaqutaassasoraara.

EU Issittumi soorlu imarsiornermut niuernermullu tunngasunik sammisaqarneruleriartorpoq, Issittorlu pillugu periusissiani 2021-mi ukiakkut saqqummersillugu.

EU nunatsinni sulianut oqartussaaqataalernavianngitsoq

Danmarkili illersornissamut tunngasuni EU-mi suleqataasalissappat, tamanna nunatsinnut ulluinnarni toqqaannartumik sunniuteqarnavianngilaq.

Danskimmi qanorluunniit taasigaluarpata, Danmark nunatsinni sakkutooqarnikkut susoqassanersoq kisimiilluni aalajangiisuusussaavoq.

- Danmarkip illersornissamut EU-mi oqaasissaqarnerulernissaa qinerneqassagaluarpat, danskit illersornissamut Kalaallit Nunaanni suliarisartagaat allanngornavianngillat. Kunngeqarfik Danmark taavalu Danmark-Kalaallit Nunaat Illersornissaqarfiup suliassaanut suli sinaakkusiisussaapput, Henrik Gram Pedersen oqarpoq.

Tamannalu aamma atuuppoq, danskit sakkutuuisa, tamatumanilu aamma kalaallit Illersornissaqarfimmi sakkutuujunissamik aalajangersimasut, immikkut suliassaqarlutik aallartinneqarsinnaaneranik apeqqummi.

Sakkutooqarnermilu, aamma Kalaallit Nunaanni, atortussanik pisiortornermi aamma atuuttoq, Henrik Gram Pedersen oqarpoq.

- Danmarkip Kalaallit Nunaanni atortussat suussanersut aamma aalajangigassaraa. Taamaammat EU-p Issittumi sulinitsinni sunik atortoqassanersugut aalajangersinnaanngilaa. Tamanna Danmarkip aalajangigassaraa.

Danmarkilu illersornissamut EU-mi oqartussaaqataalissappat, EU-mi nunat allat illersornissamut atortunik immaqa pisiortoqatigilersinnaanngussavai.

- Nunat allat atortunik pisiortoqatigisarnissaannik immaqa iluaquteqarsinnaassaaq. Taamaalippat, taava angiusuunik ingerlatsinernut imaluunniit amerlasuukkaanik pisiortornermut tunngasuni iluaquteqarsinnaassaaq, Henrik Gram Pedersen oqarpoq.

TV2 naapertorlugu danskit amerlanerussuteqartut Danmarkip oqartussaaqataalernissaanik kissaateqartut, inuit isumaannik ullut marluk matuma siorna paasiniaanerit takutippaat. Danmarkimi qinersiviit nunatta kitaata nalunaaqutaa malillugu ualeru sisamanut matussapput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl