Danmark Gaddafimut sorsoqataalerpoq
Socialdemokraatit siulittaasuat Helle Thorning-Schmidt isumaqataagaluarluni kinguneqapilussinnaanera qallunaanut paasissutigeqqullugulu mianersoqqusivoq, Libyamiulli sakkutuujunngitsut ikiortariaqarnerarpai.
Naalakkersuisut timmisartunik sorsuutinik arfinilinnik assartuummillu ataatsimik katillugit sakkutuunik 90-inik piareersimasussanik Europap kujataaliartitsiniarnerat Nunanut allanut ataatsimiititami ilaasortat akuersissutigaat.
Gadaffip sakkutuui silaannarmiit saassunneqartariaqalissappata, Nato-lluunniit sakkutuui suli piariinngikkaluarpata qallunaat timmisartuisa saassusseqataasinnaanerat aamma akuerineqarmat tupaalaatigineqarnerpaavoq.
Timmisartut F-16-it arfininngorpat ullaakkut arfinernut Europap kujataaliarunik, nunat arlallit sakkutuuminnik Libyaliartitsiniartut qallunaat sakkutuuisa akuliuffigissagaat, illersornissamut ministeri Gitte Lillelund Bech oqarpoq.
Libyami akersuuttoqarneranut nunat arlallit akuliunnialeruttortut, sakkutuujunngitsut illersorniarlugit ingerlaannaq atuutilersumik sakkutuut saassusseqqusaajunnaartut Libyap nunanut allanut ministeriata Moussa Koussap tupaallaatigineqartumik nalunaarutigaa.
Libyap silaannartaani timmisartoqqusiunnaarnissaq Naalagaafiit peqatigiit isumannaallisaanermut ataatsimiititaata sisamanngormat aalajangerpaa, akunnialunnguillu ingerlaneranni Frankrigip Libyamut saassussinnaanini nalunaarutigereeraa, Libyami naalakkersuisut sakkutuuminnik saassusseqqusiunnaarput.
Naalagaaffiit peqatigiiffiannut ilaasortatut isumannaallisaanermut ataatsimiititap aalajangiinera Libyap akuerisariaqaraa nunanut allanut ministerip oqaatigaa.
Nunanit allaneersut Libyamiittut pigisaasalu illersorneqarnissaat nunanut allanut ministerip aamma neriorsuutigigaa, tusagassiuuteqarfiup Reutersip nalunaarutigaa.