Danmark eqqartuussivilersuunneqarpoq
Pituffimmi sulisartuusimasup Danmark EF-ip eqqartuussivianut suliassanngortippaa. AG ullumi taama allappoq.
Timmisartorsuaq B-52 qaartartunik usilluni 1968-mi Pituffiup eqqaani nakkarmat sulisartoq Jeff Carswell saleeqataavoq.
Akoorutissanik sunik saleeqataasut sunnerneqarsimasinnaanersut Jeff Carswellip ukiuni 20-nngortuni paasiniartaraluarlugu naalagaaffimmit ikiorumaneqanngilaq. Jeff Carswell kræftimik nappaateqarpoq, 42-riarlunilu pilatsissimalluni.
Apeqqut uniffigineqartoq tassaavoq atomimik sakkussiat pillugit Europami naalagaaffiit aalajangersagai timmisartorsuup Pituffimmi nakkarneranut tunngatillugu tunngavigineqarsinnaanersut. Danmark isumaqarpoq atorneqarsinnaanngitsut, taamaattumillu paasissutissanik Jeff Carswellip takujumasaanik saqqummiussisariaqarnani.
EU-lli inatsisartuini ataatsimiititaliaq akerlianik isumaqarpoq. Taamaattumik apeqqut EU-p oqarrtussaaffiisa qullersaanni, EF-ip eqqartuussiviani, aalajangiiffigineqartussanngorpoq. AG-mi allaaserineqartoq naapertussagaanni suliaq ukiut arlallit qaangiuppata aatsaat aalajangiiffigineqarsinnaavoq.
