Danmark arlalissuarnik uparuarneqarpoq
Ullormi maajip aappaani nalunaaquttap akunneri pingasut atorlugit Inuit pisinnaatitaaffi pillugit Danmark nassuiaavoq. Naak Danmark inuit pisinnaatitaaffii eqqarsaatigalugit pitsaasutut isigineqaraluartoq taamaattoq immikkoortut ilaani iluarinarpallaanngitsut arlallit naammattuugassaapput.
Inuit pisinnaatitaaffi pillugit Ataatsimiittartoqatigiivinit katillugit inassuteqaatit 133-it nunanit assigiinngitsunit 47-neersunit tunniunneqarput.
CIA-p Danmarkip Kalaallit Nunaatalu silaannartaani inatsisinik unioqqutitsilluni timmisartuussisarsimaneri qanoq kinguneqartinneqassanersut pillugit ilaatigut Schweizip Danmark nalileeqqullugu kaammattorpaa. Polen aamma Spanien Kalaallit Nunaanni angerlarsimaffinni persuttaasarneq iliuuseqarfigeqqullugu kaammattuipput. Meeqqanik atoqateqartarneq pillugu kiisalu nunat akornanni inatsisinik unioqqutitsilluni inuit angallannerat pillugu nunat assigiinngitsut aalajangersaagaat Kalaallit Nunaata atsiussagaa aamma Ecuadorip piumasaraa.
Aammattaaq Kalaallit Nunaanut tunnganngikkaluartunik Danmmark arlalissuarnik uparuarneqarpoq. Qimaasutut akuerineqaqqullutik nunasiniarlutillu qinnuteqartunik sullissisarneq nunat arlallit tikkuarpaat. Nunap inoqqaavinik illersuinissaq pisortallu suliffeqarfiutaanut isernissamut qulakkeerinninnissamut Danmark Koreamit kaammattorneqarpoq.
Nalinginnaasuuvoq inassuteqaatinut angissanerlutik naaggaassanerlutilluunnit naalagaaffiit ullunik marlunnik piffissaqartitaasarnerat. Angertoqarpat taava Danmark neriorsuutiminik eqquutitsisimanersoq pillugu tullianik tusarniarneqinneqassaaq. Danmarkilli tamatumunnga akissuteqarnissani kinguartissimavaa.
- Inassuteqaatit misissuataareerneranni erserpoq inassuteqaatit ataasiakkaat isumaliutersuutiginissaannut piffissaqartariaqartoq, Nunanut allanut tunngasunut ministereqarfimmi, inuit pisinnaatitaaffi pillugit allaffimmi pisortaasoq, Allan Rahbøl Jakobsen oqarpoq.
Danmarkip akissuteqaatissaa ministereqarfiit arlallit kiisalu Kalaallit Nunaat Savalimmiullu suleqatigalugit ataqatigiissarneqassaaq.
Akissuteqaat Nalaagaaffiit Peqatigiit Inuit pisinnaatitaaffii pillugit ataatsimiittartoqatigiivisa septembarimi ataatsimiinnissaanni piareersimassaaq.
FN-mi nunat ilasortaasut tamarmik inuit pisinnaatitaaffii pillugit ukiut sisamakkaarlugit tusarniarneqartassapput. Manna tusarniaaneq Danmarkimut siulliuvoq, tullia 2015-imi ingerlanneqassaaq.
