Danmark arfanniarnissamut tapersiissaaq
Danmarkimi nunanut allanut ministerip Lene Espersenip nunani tamalaani arfanniarnermut ataatsimiititaliarsuarmi, IWC-mi, ukiuni qulini killilimmik arfanniarnissamut siunnersuut, Folketingimi amerlanerussuteqartut tunulequtaralugit tapersersussallugu piareersimaffigigaa, Politiken allappoq.
Tamatumunnga peqatigitillugu Kalaallit Nunaata ukiumut qulinik qipoqqarsinnaanera ammaassivigineqarpoq.
Siunnersuut sapaatip-akunnerani matumani Marokkomi IWC-p pisortaasa ataatsimiinneranni ullormut oqaluuserisassaniippoq.
Politikenip allagaa naapertorlugu siunnersuummi ilaatigut IWC-p iluamik atuutileqqinnissaa siunertarineqarpoq. Ataatsimiititaliarsuaq sivisuumik qanoq iliuuseqarsinnaasimanngilaq, nunat arfernik eqqissisimatitserusuttut nunallu iluanaarniutigalugu arfanniarusuttut akornanni isumaqatigiinngittoqarnera pissutigalugu.
Lene Espersenip arfanniarnissamut tapersersuinera uumasut atugarissaarnissaannik pinngortitamillu illersuiniaqatigiinnit ilaatigullu pinngortitaq pillugu nunarsuaq tamakkerlugu suliniaqatigiiffimmit assut tupaallaatigineqarpoq.
- Tamatumani uumasut ulorianartorsiortutut allanneqarsimasut pineqarput. Tamanna akuersaarneqarsinnaanngilluinnarpoq. Amerlanerussuteqartut Danmarkip ilannguffigissallugit toqqarsimasai tassaapput amerlanerussuteqartunik allanut tapersersuinngitsunik taaneqartartut. Taakkuami tassaanngillat isummat EU-mi nunanit allanit tapersersorneqanngitsut, nunarsuaq tamakkerlugu suliniaqatigiiffimmi generalsekretæri Gitte Seeberg oqarpoq.
