Danmark akuersaarmat Kuupik Kleist naammagisimaarinnippoq
- Silap pissusaa pillugu immikkut politikkeqarnerput Danmarkip akuersaarmagu iluarisimaartorujussuuvara. Kalaallit Nunaat EU-mut ilaasortaanngitsutut Danmarkitulli silap pissusaa pillugu angusaqarniartussatut pisussaaffilerneqarsinnaanngimmat Danmarkip akuersaarpaa. Kalaallit Nunaat namminerisaminik silap pissusaa pillugu anguniagaqarmat Danmarkip peqatigitillugu akuersaarpaa. Erseqqissaatigaa Namminersorneq pillugu inatsisip anersaava Danmarkip paasilluarsinnaammagu, tassa Kalaallit Nunaata annertunerujartortumik imminut nappassinnaanissaminut aningaasarsiorsinnaanissaa.
Kuupik Kleistip oqarnera naapertorlugu Kalaallit Nunaata silap pissusaa pillugu politikkia immikkoortunut agguarneqarpoq, tassa inuiaqatigiit nalinginnaasumik atuinermikkut gassinik kissakkiartuutaasunik aniatitsinerminnik annikillisaanissaannik siunnerfik, nukimmik ataavartumik pilersuinerup annertusarnissaa, aatsitassarsiornermi uuliasiornermilu aamma nukimmik annertuumik atuilluni suliffissuaqarnermik ingerlatsiniarnermi inissisimaffiup erseqqissaatigineqarnera.
Inuiaqatigiit nalinginnaasumik ingerlatitaanerannit Kalaallit Nunaat gassinik kissatsikkiartortitsisunik aniatitsinerminik 2020-p tungaanut 2007-imi aniatitat aallaavigalugit 5 procentimik apparsaassaaq. Ineqarnerup pitsanngorsarneragut, aalisarnerup iluani pitsanngorsaanikkut, soorlu ikuallaaviit kiammik pilersitsisarnerisa atorluarneragut, allallu innuttaasut pissusilersuutaasa iluaqusersuutaanerusumik kinguneqarnissaat anguniarlugu iliuusissat aqqutigalugit tamanna anguniarneqarpoq.
Kalaallit Nunaata aamma anguniarpaa nukimmik ataavartumik nukissiornerup siunnerfeqarluartumik 2013-imiit 2020-p tungaanut annertusarneqarnissaa. Kalaallit Nunaata erngup nukinga atorlugu inuiaqatigiit nalinginnaasumik innaallagissamik pilersorneqarnerat 2020-mi 60 procentimik appasinnerpaaffeqassasoq matumani anguniagaavoq, Kuupik Kleist oqarpoq.
Aamma oqarpoq, Kalaallit Nunaat aatsitassarsiornikkut aamma uliasiornikkut ukiuni kingulliunerusuni soqutiginartinneqartorujussuanngornikuusoq, aamma erngup nukinga atorlugu alumiiniumik aatsitsiviliorsinnaanissaq eqqarsaataalluni. Taamaannera peqqutaalluni aatsitassarsiorfiit nutaat ukiuni aggersuni ammarneqarnissaat pilersaarutaavoq, soorlu aamma aatsitsiviliorsinnaanissaq eqqarsaataasoq. Aamma uuliasiorfiutileqatigiit Kalaallit Nunaata imartaani uuliamik ujarlerlutik qillerinissaat pilersaarutaavoq.
Kalaallit nunaat pisussaaffilerpoq suliffeqarfiit taama ittut pilersinneqassagaluarpata nunarsuarmi tamarmi malitassiissutit naapertorlugit pilersinneqartassasut.
