Dankortinik akitsuusersuineq inerteqqutaanngilaq
Akiliutit, Dankortit assigisaallu ukiortaamiit nunatsinni 50 ørimik akitsuuserneqarnerat inatsisinik unioqqutitsinerunngilaq. Taama akitsusiineq inatsit nutaaq Danmarkimi atuuttoq tunngavigalugu pinngilaq, nunatsinnimi qanorsuarluunniit akitsuusersuisoqarsinnaavoq.
Dankorti Danmarkimi 1980-ikkut aallartilaartut atugaalermat atornera atuisunut aningaasaajaataasussaajunnaarlugu inatsisiliortoqarpoq. Elektroniskimik akiliut taanna sukkasuumik siaruarpoq, taamaattumillu atuisunit aalassassutaarujussuarpoq dankortimik atuineq akitsuuserneqarmat.
Inatsilli akitsuusersuinermut tunngasoq nunatsinni atulinngisaannarpoq, kortillu bankinut annertunerusumik aningaasartuutaanngimmata taamani akitsuusiinissaq pisariaqartinneqarsimanngilaq.
Nunatsinni inatsiseqannginera eqqarsaatigineqangaanngilaq, ukiortaamili kortillit tamatta pisinerit tamaasa 50 øreertitaasaleratta apeqqut nillikarpoq. Radioaviisimi ippassaq oqaluttuaraarput akitsuusersuinermut inatsit nunatsinni atunngimmat bankit taamaaliornerat unioqqutitsinerusoq. Ullumikkulli paasisagut naapertorlugit taamaattoqanngilaq, tassami inatsit kortinut tunngasoq akitsuusersuisinnaanermullu tunngaviusoq atortussanngortinneqanngisaannarpoq.
Dankortit atugaanerat bankinut aningaasartuutaavoq, aamma nunatsinni, taamaattumillu inatsisiliortoqarpoq akitsuusiineq pisinnaalersillugu.
Inatsit dankortinut akiliutinullu allanut tunngasoq nunatsinni atortussanngortinneqassanersoq Namminersornerullutik Oqartussani maanna misissorneqarpoq.
Inuussutissarsiornermut pisortaqarfimmiit ippassaq oqaatigineqarpoq atuisut sinniisaat malugiitsuugaqarsimasut, atuisulli allaffeqarfianni tusagassiuutinut nalunaarut naamassereerunikku aatsaat oqaaseqarniarput.
