ASSIT Daniel Skifte kuultimik nersornaaserneqarpoq

Inatsisartuni siulittaasuusimasoq, aningaasaqarnermut naalakkersuisuusimasoq Atassutillu siulittaasorisimasaa, Daniel Skifte Inatsisartut nersornaasiuttagaannik, kuultimik nersornaaserneqarpoq.
Allattoq Jens Thorin
juulip 07-at 2015 11:30

Tamanna pivoq Vejlemi juulip tallimaanni nalliuttorsiualaarnermi, Inatsisartut siulittaasuat, Lars-Emil Johansen nersornaasiisoralugu.

Inatsisartut siulittaasuata kuultimik nersornaasiinerminut tunngavilersuutigaa, Daniel Skifte 1982-imi politikki aallutileramiulli inuiaqatigiinni politikikkut ukiorpassuarni piumassuseqarluni sullissisimanera. Siullermik Inatsisartuni ilaasortatut tamatumalu kingorna Naalakkersuisunut ilaasortatut aammattaaq Inatsisartut siulittaasuattut suliaqarluni.

- Kalaallit Nunaanni politikikkut atuuffiit taakku qaffasinnersaraat, taamaalillutit Kalaallit Nunaat ullumikkut ilisimasarput ineriartortitseqataaffigisimavat, Lars-Emil Johansenip oqalugiarnermini ilaatigut taama oqarluni, Daniel Skifte nersornaaserpaa.

Nersornaat namminersornerullutik oqartussaanerup ukiut qulinngortorsiorneranni 1989-imi tunniunneqartalerpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk