Daniel pillugu suliaq suli naammassineqanngilaq
Kalaallip Danmarkimi najugallip Danielip 32-nik ukioqartup Københavnimi 2014-imi oktobarip ulluisa arfernanni aqqusiniinnarmi toquneranut atatillugu qanoq pisoqarsimanera Københavnimi Politiit ukioq ataaseq qaangiutereeraluartoq suli paaseqqissaanngilaat.
Københavnip Politiivini eqqartuussissuserisut pisortaata Dorit Borgaardip oqaatigaa politiit 2015-imi oktobarip qiteqqunnerani - tassalu pisumit ukiup ataatsip qaangiunnerani - Napparsimasut Isumannaatsumik sullinneqarnissaannut Aqutsisoqarfik oqaaseqaateqaqqullugu qinnuigisimagaat.
Peqqinnissaqarfimmi sulisut tungaannit imaluunniit taakku akornanni attaveqaqatigiinnermi inatsisinik unioqqutitsisoqarsimanersoq oqaaseqaateqarnermi qulakkeerniarneqassasoq eqqartuussissuserisut pisortaata ilisimatitsissutigaa.
Napparsimasulli Isumannaatsumik sullinneqarnissaannut Aqutsisoqarfik oqaaseqaateqarnissaminut paasissutissanik amerlanerusunik politiinut noqqaasimavoq. Paasissutissallu taakku sapaatit-akunneri 2-3-t qaangiuppata tunniunneqarsinnaanissaat naatsorsuutigineqarpoq. Tamatuma kingorna aqutsisoqarfik oqaaseqaasiussaaq Københavnimilu Politiit suliaq ingerlateqqissinnaanngussallugu.
Aamma atuaruk Daniel pillugu saaffiginnissutit piniarlugit politiit ajornartorsiorput
Aamma atuaruk Pisortaq: Danielimut tunngatillugu 'inuiaassuseq aallaavigalugu pingaarnersiuisoqartarsimarpasippoq
Peqqarniisaarniartoqarnera paasiniaanerup kinguaattoorutigineqarneranut pissutaasoq
Daniel pillugu suliaq immikkut sammineqarsimavoq, tamatumunnga pissutaavoq Daniel Amagerbro Torvimi ullukkut aqullaarmat politiit ambulancellu nalunaaquttap akunnerata affaa qaangiummaat aatsaat takkussimammata.
Inuit sanioqquttut arlallit politiit oqarasuaataannut 114-imut aammalu Kalerriisarfimmut ikioqqullutik sianertaraluartut taama pisoqarpoq - aamma angut pineqartoq kalaaliunersoq ataasiarlugu apeqqutigineqarsimavoq.
Taamatulli apeqquteqarnissaq pisariaqanngikkaluartoq Københavnip Politiivini politikommissærip Peter Dahlip kingorna KNR-imut nassuerutigaa.
Københavnip Politiivisa suliap sivisuumik suliarineqarnera ajuusaarutigaat "2015-imilu februaarip qaammataani peqqarniisaarniartoqarnera politeeqarfimmilu suliat annertuut arlallit allat immikkut ittumik ulapputigineqarsimanerat" pissutaanerarlugu.
Aamma atuaruk Angerlarsimaffeqanngitsup toqunerata kingorna piareersimasuutitat isornartorsiorneqartut
Aamma atuaruk Københavns Politi oqarasuaatikkut kalerrisaarummut tunngasumik sallusimallutik nassuerput
